تورکی دولتلر تشکیلاتی دولت رهبرلری‌نینگ ۱۲ – دور ییغینی، بوگون سه‌شنبه ۱۵ – میزان، آذربایجان مملکتی‌نینگ قبَله شهریده اۉتکزیلیشی ریجهلشتیریلگن.
دیمک اوشبو ییغین «منطقوی تینچ‌لیک و خوفسیزلیک» موضوع‌سی آستیده اۉتکزیلیب، بو تشکیلات‌گه اعضا مملکتلر دولت رهبرلری اشتراک اېتیشی کوتیله‌دی.
ییغین آذربایجان‌نینگ تاریخی شهرلریدن بۉلمیش «قبَله» شهری میزبان‌لیگیده اۉتکزیلماقده دیر که اونگه تورکیه، آذربایجان، اۉزبېکستان، قزاقستان و قرغیزستان دولت رهبرلری اشتراک اېته‌دی.
شونینگدېک بو ییغین‌ده، تورکی دولتلر تشکیلاتی‌نینگ کۉزهتووچی اعضالری بۉلمیش مجارستان، تورکمنستان و شمالی قبرس تورک جمهوریتی یوقاری مرتبه رسمی‌لری هم اشتراک اېتیشی ممکن دیر.
حاضرگچه اوشبو ییغین‌ده اشتراک اېتیش مقصدیده، اۉزبېکستان، قزاقستان، مجارستان، شمالی قبرس تورک جمهوریتی و قرغیزستان دولت رهبرلری آذربایجان‌گه ییتیب کېلگن.
ایتیش کېره‌ک که تورکی دولتلر تشکیلاتی دولت رهبرلری‌نینگ ۱۱ – دور ییغینی اۉتگن ییلی، قرغیزستان‌نینگ بیشکک شهری میزبان‌لیگیده اۉتکزیلگن اېدی.
