میرزا محمدنینگ اۉغلی محمد قاسم، ۱۳۳۷-ییلده میمنه شهری‌نینگ همت‌آباد محله‌سیده ضیالی و فراوان بیر عایله‌ده توغیلگن. او دستلبکی تعلیمنی همت آباد باشلنغیچ مکتبیده، اۉرته و یوقاری صنفلرنی اېسه ابوعبید جوزجاني لیسه‌سیده تمامله‌گن. ۹–۱۰-صنفلرده او اۉزی‌نینگ چیرایلی آوازی بیلن اجره‌لیب توریب، لیسه‌‌نینگ هنری گروهیگه قۉشیلگن.
محمد قاسم کویلشده مشهور قۉشیقچی ناشناس‌نینگ اسلوبیگه اېرگشگن و اونینگ قۉشیقلرینی اۉزیگه خاص جۉشقینلیک بیلن اجرا اېتگن. او تورلی هنری برنامه‌لر، بیره‌ملر و رسمي تدبیرلرده فعال اشتراک اېتیب، اۉز صنعتینی نمایان قیلگن همده لیسه نینگ اېنگ فعال اعضالریدن بیری بۉلگن.
کانکور امتحانینی تاپشیرگچ، او کابل بیلیم یورتی‌نینگ اېکینچیلیک فاکولته‌سیگه اۉقیشگه کیرگن و ۱۳۶۳-ییلده اونی بیتیرگن. تحصییل دوریده هم او کابل بیلیم یورتی ادیتوریمیده، اېکینچیلیک فاکولته‌سیده همده مرکزي یاتاقخانه‌ده اۉتکزیلگن تورلی مدني برنامه‌لرده قتنه‌شگن.
اما خوفسیزلیک بحرانی و بې‌قرارلیک کوچیگچ، محمد قاسم وطننی ترک اېتیشگه مجبور بۉلگن. او حاضرده عایله‌سی بیلن آسترالیاده استقامت قیله‌دی.
مېن اونی ۱۳۶۴–۱۳۶۵-ییللرده کابل بیلیم یورتی‌نینگ مرکزي یاتاقخانه‌سیده اۉتکزیلگن اَیریم شخصي و رسمي تدبیرلرده کۉرگنمن. اېسیمده، ۱۳۶۴-ییل‌نینگ کوزیده‌گی بیر کېچه‌ده، اېکینچیلیک فاکولته‌سی اۉقیتووچیسی و حزب بۉلیمی‌نینگ کاتبی بۉلگن عبدالله هراتی‌نینگ اتاغیده اۉتکزیلگن صمیمي موسیقي ییغینده او قوییده‌گی قۉشیقنی اجرا اېتگن اېدی:
مردم در ارزویت، ای من اسیر مویت
پروانه سان بسوزم، ای شمع روبرویت
محمد قاسم سعد قۉشیق کویلش بیلن بیرگه هارمونیه هم چه‌لگن. او اساسا ناشناس و اۉز دوری‌نینگ باشقه مشهور خواننده‌لری‌نینگ قۉشیقلرینی قَیته اجرا اېتگن. سعدلر عایله‌سیده کویلش صنعتی دېیرلی میراثي بۉلگن اونینگ اکه‌سی کاظم فهیم هم ۱۳۵۷–۱۳۷۰-ییللر آره‌لیغیده تورلی مراسم و رسمي تدبیرلرده کویلب، چیرایلی آوازی بیلن تنیلگن اېدی.
افسوسکی، اجتماعي ترماقلرده (فیس‌بوک و یوتیوب) اوزاق ایزلنیشلرگه قره‌مه‌ی، مېن محمد قاسم‌نینگ صحیفه‌سی یاکه اونینگ اجرالریگه عاید بیرار لینکنی تاپه آلمه‌دیم. شونینگدېک، تورلی مملکتلرده یشه‌یاتگن دۉستلری و سابق همکورسلریگه، جمله‌دن حاضر اروپاده یشه‌یاتگن ناظم سعدگه هم مراجعت قیلدیم. اما بیر نېچه هفته کوتگنیمگه قره‌مه‌ی، او مېنینگ التماسیمگه جواب بېرمه‌دی. شو سببدن، معلوماتلریمنی کېنگه‌یتیریش و اونینگ صور‌تینی تاپیش‌نینگ علاجی بۉلمه‌دی.
اوشبو بحث‌نینگ دوامی بار…
یازوچی: محمد کاظم امینی
ملارد-بهاره غربی
ترجمان: تۉلقین
