مصرنینگ شرم‌الشیخ شهری بوگون آقشم دوشنبه ۲۱ – میزان، غزه خصوصیده بۉلگن ییریک بیر ییغین‌دن میزبان‌لیک قیلدی.
امریکا جمهور باشلیغی دونالد ترامپ و مصر جمهور باشلیغی عبدالفتاح السیسی قوشمه باشچیلیگیده اۉتکزیلگن اوشبو ییغین‌ده، بیرلشکن ملتلر تشکیلاتی باش کاتی آنتونیو گوتریش‌گه قوشیمچه، ۲۰ دن آرتیق مملکت دولت رهبری اشتراک قیلدی.
ییغین‌ده، اسراییل باش وزیری بنیامین نتنیاهو و ایران جمهور باشلیغی مسعود پزشکیان اشتراک اېتیشگه تیار بۉلمه‌دیلر.
شوندی بۉلسه هم دنیا و منطقه‌نینگ مهم مملکتلری دولت رهبرلری اشتراک اېتیب، غزه‌ده تینچ‌لیک تامین‌لنیشی، اوروش‌دن کېین بو شهر قیته قوریلیشی همده یقین شرق حدودی‌نینگ خوفسیزلیگی و برقرارلیگی خصوصیده، فکر المشتیردی‌لر.
مذکور ییغین‌ده اشتراک قیلگن، مملکتلر دولت رهبرلری یوقاریده‌گی مساله‌لرگه قره‌تیلگن بیر قوشمه بیانات‌نی هم امضا قیلگنلری معلوم قیلینگن.
اوشبو ییغین غزه‌ده آتیش-کېسین کېلیشووی عملگه آشیریلیشی بیلن بیرگه اۉتکزیلماقده دیر.
سونگی ایکی کون ایچیده، غزه‌ده ایکی ییل‌دن بیری دوام اېتیب تورگن اوروش یکونلنیب، شرم‌الشیخ ییغینی عرفه‌سیده حماس گروهی و اسراییل اوروش اسیرلرینی آزاد قیلدی‌لر.
دېیرلی بو اوزگریش‌لر، غزه‌ده اوروش بوتونله‌ی یکونلنیب، تینچ‌لیک دواملی بۉلیشی اوچون امیدلرنی کوچه‌یتیرگن.
