قند‌هار ولایتیده‌گی منبعلر طالبان و پاکستان حربيلری اۉرته‌سیده‌گی تۉقنه‌شوولرده تلفاتلر آرتگنینی بیلدیره‌دی.
بیر ساغلیق منبعسی‌نینگ ایتیشیچه، شفاخانه‌لرده بیر نېچته یره‌دارلرنینگ وفات اېتیشی نتیجه‌سیده هلاک بۉلگنلر سانی 39 کیشیگه یېتگن.
طالبان‌نینگ اسپین بولدیک‌ده ساغلیقنی سقلش بۉلیمی باشلیغی زبیر آغا بېرگن معلوماتیده، هلاک بۉلگنلر سانی 40 نفرگه یېتگن.
منبع، شونینگدېک، یره‌دارلر سانی 171 نفر اېکنینی بیلدیرگن و اولرنینگ اَیریملری نینگ احوالی آغیرلیگینی قۉشیمچه قیلگن.
منبعلر آره‌سیده حربي خدمتچیلر هم بار-یۉقلیگی انیقلنمه‌گن، بیراق جَنوبي ولایتلردن کېلگن معلوماتلرگه کۉره، ایکّی نفر طالبان جنگریسی نینگ جسدی نیش تومنیگه، بیری معروف، بیری سپین بولدیک و ینه ایکّی جسد ارزگان ولایتی نینگ دهراود اولسواللیگه آلیب باریلگن.
طالبان حاضرچه ینگیلنگن رسمي رقملرنی اعلان قیلمه‌گن. طالبان مطبوعات سۉزلاوچیسی ذبیح‌الله مجاهد کېچه بیاناتیده، پاکستان هجوملریده 12 کیشی هلاک بۉلگن و 100 دن آرتیق آدم یره‌لنگنینی بیلدیرگن اېدی.
افغانستانده‌گی بیرلشگن ملتلر تشکیلاتی (یوناما) بوگون بیلدیرگن معلوماتگه کۉره، دستلبکی حساب-کتابلرگه بناءً، طالبان و پاکستان اۉرته‌سیده‌گی چېگره تۉقنه‌شوولریده کمیده 18 تینچ اهالی هلاک بۉلگن، 360 دن آرتیق کیشی اېسه یره‌لنگن.
یوناما حاضرچه انیق رقملرنی بهاله‌ماقده، بیراق حاضرگی معلوماتلرگه کۉره، کمیده 17 تینچ اهالی اسپین بولدیک نینگ افغانستان تامانیده هلاک بۉلگن و 346 کیشی یره‌لنگن.
شونینگدېک، بیرلشگن ملتلر تشکیلاتی‌نینگ نماینده‌لیگی ایلگری پکتیکا، پکتيا، کنر و هلمند ولایتلریده کېچگن چېگره تۉقنه‌شوولریده هم کمیده 1 کیشی هلاک بۉلیب، 15 کیشی یره‌لنگنی حقیده معلومات بېردگن اېدی.
بیرلشگن ملتلر تشیکلاتی برچه تامانلرنی تینچ اهالی نینگ حیاتینی حمایه قیلیش و قۉشیمچه تلفاتلرنینگ آلدینی آلیش اوچون دشمنلیک حرکتلرینی تۉخته‌تیشگه چقیردی.
طالبان و پاکستان اۉرته‌سیده‌گی جنگلر شنبه آقشامیدن باشلنگن. طالبان نینگ بیلدیریشیچه، اولر پاکستان نینگ کابل و پکتیکا‌گه قیلگن هوا هجوملریگه جوابن پاکستان چېگره پُسته‌لریگه هجوم قیلگن. پاکستان اېسه اۉز نوبتیده، طالبان نینگ هجوملریگه جواب بېرگنینی و جنگلر شرقي همده جَنوبي ولایتلرده دوام اېته‌یاتگنینی معلوم قیلگن.
کېچه پاکستان هوا کوچلری قند‌هار نینگ اسپین بولدک تومنی نینگ اَیریم قِسملرینی بامباردمان قیلگن. شونینگدېک، کابل شهریده کېچه‌گی پارتلشلر هم پاکستان نینگ هوا هجوملری عاقبتی بۉلگنی حقیده خبرلر بار. کابلده‌گی ایمر جنسی شفاخانه‌سی معلوماتیگه کۉره، پارتلشلرده 5 کیشی هلاک بۉلگن، 35 کیشی یره‌لنگن.
بیراق، کېچه ساعت 5:30 دن سۉنگ هر ایکّی تامان اۉت آچیشنی تۉخته‌تگنینی اعلان قیلدی. پاکستان یېتکرمه‌لریگه کۉره، بو اۉت آچیشنی تۉخته‌تیش 48 ساعتگه مۉلجللنگن. اما خبرلر اسپین‌بولدک ده کېیچه آتیش کېسین بوزیلگنینی کۉرسه‌تماقده.
