لوگر ولایتیده جمعی ۲.۲میگاوات قوّتگه اېگه بۉلگن اوچته برق تأمینات لایحه‌سی یکونله‌نیب و فایده‌لنیشگه تاپشیریلدی. لایحه‌لر عمومي ۴۴ میلیون افغانی خرجت کوترگن.
رسميلرنینگ سۉزلریگه کۉره، ولایت مرکزی و تومنلریده ۱۲ ته ترانسفرمر ایشگه توشیریلگن بۉلیب، ایکّی مینگ عایله برق انرژیسیدن فایده‌لنه‌دی.
برشنا شرکتی رییسی عبدالباری عمر «لوگر ولایتی نینگ سکّیز قیشلاغیده ایکّی مینگ عایله اوچون برق تأمیناتی یره‌تیلدی، بو لایحه نینگ عمومي خرجتی ۴۴ میلیون افغانی بۉلدی.» دیب ایتدی.
عمر شونینگدېک، کېلگوسی بېش ییلنی افغانستانده برق ساحه‌سینی رواجلنتیریشده مهم دور دېب حسابله‌یدی و بو وقتده انرژی ایشلب چیقریشیمیزنی مستحکملش بۉییچه سعی-حرکتلر باشلنیب، یوزلب میگاوات برق ایشلب چیقریش بۉییچه شرطنامه‌لر عملگه آشیریله‌یاتگنینی تأکیدله‌گن.
اونینگ سۉزلریگه کۉره، ینگی برق ترماقلری و سب ایستیشن توگه‌تیش بیلن مملکت‌ده صناعت و سودا ساحه‌سیده کتّه اۉزگریشلر یوز بېره‌دی.
عمر “برشنا شرکتی کېلگوسی بېش ییل ایچیده افغانستاننی برق ایشلب چیقریشده اۉزینی اۉزی تأمینلشگه قره‌تیلگن سعی و حرکتلرنی کوچه‌یتیره‌دی” دیب قوشیمچه قیلدی.
شونینگدېک، دولت شرکتلری باشلیغی‌نینگ ایتیشیچه، افغانستان اقتصادي برقرارلیککه یقینلشگن و پاکستان نینگ سۉنگی هوا هجوملرینی تیلگه آلیب، بعضی قۉشنی دولتلر حاضرگی افغانستان حالتینی کۉرستمسدن، بېزاوته‌لیک یره‌تیشگه اورینه‌یاتگنی حقیده تأکیدله‌ماقده.
دولت شرکتلری باشلیغی احمدجان بلال، «اولر مملکتیمیزده خاطرجمعلیکنی بوزیش و بېزاوته‌لیک یره‌تیش اوچون حرکت قیلماقده‌لر و بیز نینگ حدودیمیزگه هجوم قیلیشماقده،» دېدی.
شو بیلن بیرگه، لوگر ولایتی اهالیسی نینگ بعضیلری، بو برق تأمیناتی لایحه‌لری نینگ عملگه آشیریلیشی اولر نینگ کۉپلب معمالرینی حل قیلیشیگه یاردم بېریشینی ایته‌دیلر و بو باره‌ده حکومتدن ینه-ده کۉپراق اعتبار قره‌تیشنی سۉره‌یدیلر.
لوگرلیک محمد یعقوب شونده‌ی دېدی: “بیز برقدن سوونی ایسیتیش، یېرلرنی سوغاریش و قیش فصلیده اویلریمیزنی ایسیتیش اوچون فایده‌لنه‌میز.”
برشنا شرکتی نینگ معلوماتلریگه کۉره، حاضرده مملکت نینگ تورلی منطقه‌لریده ۸۵۰ ته برق ترماغی لایحه‌سی عملگه آشیریلماقده، اولر نینگ توگه‌شی بیلن آلدین سۉراودن اۉتگن یوزلب قیشلاق برق ترماغیگه اولنیش امکانیتی بېریله‌دی.
