قزاقستان قهرمانی بیرینچی لیگه وکیلی «خان تېنگری» کلوپی هجومچیسی دیس تولېو وفات اېتدی. بو حقده قزاقستان فوتبال فدراسیونی مطبوعات خدمتی خبر بېردی.
اونگه کۉره، فوتبالچی «خن-تېنگری» همده «اېکیبستوز» اۉرته‌سیده‌گی اۉییننی اساسي ترکیبده باشله‌گن. بیراق ایکّینچی بۉلیمده اۉزینی یامان حس قیلگنی باعث، “خن-تېنگری” فوتبالچیسی میداندن زمبیلده آلیب چیقیلگن. طبیات خادملری زودلیک بیلن فوتبالچیگه یاردم کۉرسه‌تیشگه حرکت قیلگن. بیراق داکترلرنینگ برچه اورینیشلریگه قره‌می، دیس تولېونی حیاتگه قَیتریب بۉلمه‌گن.
قزاقستان فوتبال فدراسیونی تولېو نینگ عایله‌سی، قرینداشلری و برچه یقینلریگه چوقور تسلیت اظهار اېتیب، بو نه‌فقط کلوپ، بلکه بوتون مملکت فوتبالی اوچون کتّه یۉقاتیش اېکنینی تأکیدله‌گن.
«بو آغیر دَملرده دیس نینگ عایله‌سی، یقینلری و «خان-تېنگری» جماعه‌سیگه چوقور همدردلیک بیلدیره‌میز. اونینگ خاطره‌سی یوره‌گیمیزده منگو سقلنیب قاله‌دی»، دېگن فدراسیون بیاناتیده.
معلومات اوچون، دیس تولېو 2006 ییل نینگ 4 می سنه‌سیده توغیلگن. او یاش بۉلیشیگه قره‌مه‌ی، قزاقستان بیرینچی لیگه‌سیده‌گی اېنگ استقباللی فوتبالچیلردن بیری صفتیده نام قازانگن اېدی.
اېسله‌تیب اۉتمیز، اوّلراق «ارسېنال» نینگ سابق فوتبالچیسی بیللی ویگر «چیچېستېر سیتی» صفیده اۉینه‌گن اوچره‌شووده مییه‌سیدن جدّي جراحت آلیب، 21 یاشیده حیاتدن کۉز یومگندی.
