بدخشان ولایتی ارگو تومنی‌دن محلی منبع‌لرنینگ اۉزبېک تی‌وی گه یازیشیچه، بو تومن‌نینگ دین عالملریدن بیری عبدالباسط واثق ایکی یریم آی ایلگری طالبان تامانیدن حبسگه آلینگن بۉلیب و حاضرگچه بی‌درک یۉقالگن.
بو حقده اۉزبېک تیویگه یوباریلگن معلوماتده، واثق ارگو تومنی‌نینگ «برلاس چنار» حدودی یشاوچیسی بۉلگنی بیلدیریلیب، بو کیشی ایکی یریم آی ایلگری خفتن نمازینی اۉقیب چیققن‌دن کېین، طالبان حربی‌لریدن بیش کیشی آرقه‌لی حبسگه آلینگنی معلوم قیلینگن.
اۉزبېک تی‌وی بو مساله‌گه انیق‌لیک کېریتیش مقصدیده، ارگو تومنی‌ده‌گی ایشانچ‌لی منبع‌لردن هم معلومات سۉره‌دی که مذکور منبع‌لر هم خودی شوندی واقعه یوز بېرگنینی تصدیق‌له‌یدی.
ایتیلیشیچه طالبان بو شخص‌نی حبسگه آلینیشی‌گه قرشی‌لیک کۉرسه‌تگن اهالینی هم تهدید قیلگن.
شونینگدېک طالبان محلی رسمی‌لری واثق اوشلنگن زمانلرده، اونینگ عایله‌سیگه اوشله‌گنلرینی تصدیق‌لگن اېدی. بیراق حاضر بوندی بیر شخص قماقخانه‌لریده یۉق‌لیگینی اَیته‌دی دېدی. اۉزبېک تی‌وی منبع‌لری بو حقده شریک قیلگن معلومات‌لریده.
شونینگدېک مذکور معلوماتده، عبدالباسط واثق عادی حیات بیلن بند بۉلگنی و سیاسی مساله‌لرگه اره‌لشمه‌گنی بیلدیریلگن.
