گلچهره خواجه یا «گلی» ۱۹۷۳. ییلیده اورومچی, شرقی تورکستان یا چین سینزیانیده توغیلگن. آته‌سی تانیقلی یازووچی و ارکیالوک بۉلیب, سینزیان حدودی موزه‌سی نینگ ارکیالوگیه بۉلیمی باشلیغی بۉلگن. آته‌سی اثرلرینی اویغور تیلی و تاریخیگه بغیشله‌گن اېدی؛ اونینگ ارکیالوگی تدقیقات ایشلری اېسه «تاریم باسین»ده تاپیلگن مومیالر اوستیده اېدی. آنه‌سی فارماکلوژی پروفیسوری و داروخانه‌ده هم فارمسست بۉلیب ایشله‌گن. گلچهره نینگ اۉزیدن بیر یریم یاش کیچیک اوکه‌سی بار. اونینگ باباسی اېسه عنعنوی اویغور موسیقه‌سی نینگ مشهور بسته‌چیسی بۉلگن.
گلچهره خواجه نینگ هر تمانله‌مه حیاتی بیلن کۉپراق تانیشه‌یلیک:
گلچهره، ۲۳ ییلدن آرتیق پروفیشنل تجربه‌گه اېگه بۉلگن اویغور و خلق ارا کتته ژورنالیست, یازووچی, آنه, اوی بیکه‌سی و سورگونده‌گی اویغور خاتین دیر. او, باله‌لیگیده اویغورلر تمانیدن باشقریلگن اویغور تیلیده‌گی مکتبلرده اۉقیگن. گلچهره, سینزیان پیداگوژی بیلم یورتینی بیتیرگن. او یېرده اویغور تیلی و ادبیاتی بوییچه لیسانس یا بچلور درجه‌سینی آلگن. بیلیم یورتنی بیتیرگنیدن سۉنگ گلچهره خواجه, ختایده‌گی بیرینچی اویغور تیلیده‌گی باله‌لر کۉرستووی نینگ باشلاوچیسی بۉلدی. او, اوشبو رولی آرقه‌لی بوتون سینزیان بۉیلب تانیقلی کیشیگه ایلندی. او، ختای دولت عاموی اخبارات واسطه‌لریده, جمله‌دن سینزیان تلویزیونیده, ختای مرکزی تلویزیونیده (سی سی تی وی), (پیکین تی وی), (هانگ کانگ هوا یو تی وی) و ( شوندونگ تی وی) کانالریده ختای تیلیده‌گی تورلی کورستوولرنی هم آلغه آلیب بارگن. او، چین رادیو و تلویزیونی نینگ اداره‌سی تمانیدن “آ درجه‌لی باشلووچی” صفتیده تن آلینگن.
گلچهره، ختای دولت عاموی اخبارات واسطه‌لریده ایشلشدن ناقولیلیک حس قیله باشله‌دی. چونکه او اویغور باله‌لری نینگ اویلری و قشلاقلریدن آلیب کیتیلیب, اساسی قطعه یا قوروقلیکده ختایده وایه‌گه یېتکزیله‌یاتگنینی و ختای دولتی نینگ اویغور خلقیگه قیلیب تورگن ظلملرینی کۉریب, راپورتاژ قیلگن اېدی.
۲۰۰۱ییلیده گلچهره خواجه، اتریشده تعطیلده بۉلگنیده, بیرینچی مرته انترنتدن قوللنه دی. ختای تشقریسیده‌گی اویغور فعاللری حقیده انچه کۉپ نرسه‌لرنی بیلیب آله‌دی. اتریش نینگ باشکینتی وین شهریده بۉلگنیده, ختای دولت اجتماعی ترماقلریده ایشله‌گنیدن اویالیب, ختایگه قیتمسلیکیگه قرار قیله‌دی. اوشه یېل نینگ اوکتوبر آییده, خواجه امریکاگه هجرت قیله‌دی. «رادیو-فری-آسیا»”اېرکین آسیا رادیوسی”ده ایشله‌ی باشله‌یدی. بو ختای تشقریسیده‌گی یگانه مستقل اخبارات قیناغی که اویغور تیلیده فعالیت کۉرسته‌‌دی. اولر اۉز فعالیتلریدن قیسی دیر تجاری منفعتنی کۉزگه توتگن اېمسلر. گلچهره، بو یېرده انسان حقوقلری, ساغلیقنی سقلش, اقتصادیات, تعلیم, مدنیت و اجتماعی عدالت همده ختای حکومتی تمانیدن اویغورلرگه نسبتا باسم و فشارلری حقیده؛ اجتماعی-سیاسی موضوعلر بوییچه انچه تدقیقات آلیب باره‌دی و راپورتاژلر تیارله‌یدی. عاقبتده ختای تمانیدن “قیزیل بیلدیریشنامه” یوباریله‌دی و وطنگه قیتیشی تقیقلنیب قویله‌دی.
گلچهره «آر اف آ » نینگ اویغور خدمتیده ایشلاووچی, عایله اعضالری یوقالگن, حبسگه آلینگن یا که قملگن ژورنالیستلردن بیری دیر. چونکه ۲۰۱۷ یېلیده ختای حکومتی گلچهره خواجه‌نی تیرورچی دېب عیبله‌یدی و اونی اېنگ کۉپ قیدیرله‌یاتگنلر رویخطیگه کیریته‌دی. عینا شو دورده گلچهره نینگ اوکه‌سی حبسگه آلیندی. گلچهره نینگ ژورنالیستیک فعالیتی سببلی سینزیانده‌گی لگر یا اردوگاه‌لردن بیریگه جایلشتیریله‌دی. عینی دمده اونینگ 25 قرینداشی سینزیانده‌گی “قیته تربیه‌لش لگرلریده” سقلنگنلر. بولر نینگ برچه‌سی اویغور ملی اۉزلیگی و کیملیگنی یۉق قیلیش مقصدیده عملگه آشیریله‌دی. او، شخصی یوقاتیشلریگه قره‌مسدن, اویغورلر نینگ حقوقینی حمایه قیلیشگه دوام اېته‌دی.
۲۰۱۰ ییلیده, «آر اف آ» نینگ مولتی مدیا جماعه‌سی تمانیدن ایشلب چیقیلگن, “سینزیان نینگ یریم آسمانی” آتلی لایحه اوچون گرسی مکافاتینی آلدی. آره‌دن بیر یېل اوتیب, او «دیوید بورک» مکافاتی بیلن تقدیرلنه‌دی. بو مکافات تانیقلی ژورنالیستلرگه بیریله‌دی.
۲۰۲۱ییلی نینگ اپریل آییده, گلچهره خواجه نینگ آنه‌سی و اوکه‌سیدن آلینگن ویدیولر ترقتیلدی. اولر، ویدولرده عادی حیات کیچره‌یاتگنلرینی ایتیشدی و گلچهره نینگ راپورتاژلرینی تنقید قیلیشدی. بیراق، گلچهره بو بیاناتلر نینگ مجبوری کۉرستمه‌لر اساسیده بیریلگنیگه ایشانه‌دی.
۲۰۲۱ییلیده گلچهره خواجه امریکا دولت کاتبی مایک پامپ یو بیلن اوچرشدی. او، اوشبو اوچرشووده سینزیانده‌گی اوردوگاهده یقینلری و حبسده سقلنه‌یاتگنلر آتلریدن قتنشگن.
عینا شو ییلده سېنزیانده‌گی انسان حقوقلری انقراض حقیده‌گی راپورتاژلری اوچون «مگنیت ایسکای» انسان حقوقلری مکافاتیگه سزاوار بۉلدی.
۲۰۲۰یېلیده او دنیا نینگ اېنگ تاثیرلی ۵۰۰ مسلمانی رویخطیگه کیریتیلدی. ینه شو یېلده, خلق ارا عیاللر «او ا وی» جمغرمه‌سی « آی دبلیو ام اف» تمانیدن اونگه جسور ژورنالیست مکافاتی تاپشیریلدی.
گلچهره نینگ ایتیشیچه, بوگونکی کونده, اونینگ یگیرمه‌دن آرتیق قرینداشی ۸۰۰.۰۰۰ دن ۲ میلیونگچه بۉلگن اویغورلر و باشقه مسلمان اۉزچیلیکلر قطاریده؛ “کلتوری و مدنی سوی قیریم” تهدیدی آستیده توریبدی.
“قیته تربیه‌لش” مرکزلری صفتیده تصنیفلنگن بو لگرلرده “جسد یاقیش اوچاقلری” هم موجود. گلچهره، لگرلردن قاچگنلر, قماقخانه قۉریقچیلری و ایریم رسمی مقاملر بیلن خوفلی انترویولر آلیب بارگچ, امریکا تمثیلچیلر مجلسی نینگ تشقی ایشلر کمیته‌سی آلدیده, انسان حقوقلری حقیده خبر بیریش خوفلری باره‌سیگه گواه‌لیک بیردی.
۲۰۳۵ییلیده گلچهره خواجه اۉزی نینگ ینگی اېسده‌لیک کتابنی (تاش اۉز جاییده اېنگ قدرلی بۉله‌دی) آتی بیلن باسیمدن چیقردی. اوشبو کتابده او؛ باله‌لیگی, چین دولتی نینگ عاموی اخباراتیده فعالیتلری, وطندن ایریلیش سببلری و امریکاده ژورنالیست صفتیده‌گی فعالیتی حقیده یازگن.
۲۰۲۴ییلی گلچهره “مهاجر اویغورلر صنعت آرقه‌لی ختای نینگ کلتوری مدنی سویقریمگه قرشی کورشماقده” دېب یازه‌دی. شو بیلن او, اروپا و امریکاده‌گی اویغور رساملری, یازووچیلری و موسیقه‌چیلری نینگ فعالیتنی یاریتگن. ۲۰۲۳. یېلیده, گلچهره پاکستانده‌گی اویغور مهاجرلری اوستیدن نظارت و تهدیدلر حقیده هم خبر تیارله‌گن. ۲۰۲۵. یېلی نینگ اپریل آیېده ” آر اف آ” تشکیلاتی اویغور خدمتی یاپیلیشی ممکن دېب خبر بیردی. گلچهره بو حقده اینتریو بیریب, اویغور خلقی نینگ سیسیلری نینگ تاخته‌تیلیشی کتته خطرلرگه سبب بۉلیشینی اورغوله‌دی. گلچهره حاضر تورموش اۉرتاغی و اوچ فرزندی بیلن «وود بریج» ویرجینیا شهریده یشه‌یدی. اونینگ حیاتی ژورنالیستلریمز اوچون الهام بیروچی و حیاتی اۉرنک دیر.
