افغانستان سابق سیاسی سیمالریدن سردارمحمد رحمان اۉغلی اۉزی‌نینگ فیسبوک صحیفه‌سیده بیر بیانات یازیب، اۉزبېک خلقی‌نینگ ییریک کوره‌شچی‌لریدن ابراهیم بیک لقی‌نینگ تقدیری‌دن اېسلب، اویغور و اۉزبېک جهادی‌لرنینگ تقدیری هم خواطرلی دېب بیلدیرگن.
جناب رحمان اۉغلی‌گه کۉره، تاریخی اوشبو تجربه‌لردن کېلیب چیققن حالده ایتیش ممکن که تورکستان اسلامی حرکتی و شرقی تورکستان حرکتی اعضالری طالبان آرقه‌لی معامله اېتیلیش‌لری ممکن دیر.
افغانستان سابق سیاسی سیمالریدن بو کیشی بیاناتی‌نینگ بیر بۉلیمیده کېلیشیچه “افغانستان حکومت‌لری تورکستان‌نینگ مشهور مجاهدی ابراهیم بیک لقی‌نی روسلرگه تاپشیردی و ظالم شوروی حاکمیتی اونی دار آستیگه یوباردی. تورکستان اسلامی حرکتی مجاهدلری، طاهر یۉلداش و جمعه نمنگانی باشچیلیگیده‌گی حرکت‌نی پاکستان استخباراتی و حربی‌لری همکارلیگیده سوات‌ده قیریشدی. طاهر یۉلداش‌نینگ اۉغیللری و بو حرکت‌نینگ قالگن ییتکچیلرینی بیرمه-بیر اۉلدیریشدی. ایندی اېسه اولر حاضرگی توزوم/طالبان زنجیری‌ده.”
شونینگدېک افغانستان‌ده حضوری بۉلگن شرقی تورکستان حرکتی‌نینگ اعضالری هم کېله‌جکلری خواطرلی دېب بیلدیرگن. سردارمحمد رحمان اۉغلی جنابلری.
رحمان اۉغلی بو حرکت اعضالری بیر معامله اساسیده، چین‌گه تاپشیریلیشی ممکن‌لیگین تاکیدلب یازیشیچه “شرقی تورکستان‌نینگ کمونست چین ظلمی‌گه قرشی اۉز یورتی‌نینگ آزادلیگی اوچون کوره‌شیب یاتکن مجاهدلری، افغانستان‌نینگ ایریم حدودلریده یشه‌ب توریبتی‌لر اما مطلقا ایرکین اېمس. هر لحظه یا که بیر کون یشیرین حالده اوشه مملکت/چین‌گه تاپشیریلیشی ممکن.”
شونینگدېک رحمان اۉغلی افغانستان تاریخیده بوندی معامله‌لر کۉپ یوز بېرگنینی تاکیدلگن.
ایتیش کېره‌ک که طالبان حاکمیت‌گه قیتگنیدن بیری شرقی تورکستان جهادلری‌نینگ غایه‌لریگه قرشی چین بیلن یخشی مناسبت برقرار قیلماقده دیر.
اۉزبېک تی‌وی بوندن ایلگری بیر مقاله یازیب، بو گروه طالبان سایه‌سیده اۉز غایه‌سیدن اوزاق‌لشیب تورگنینی بیلدیرگن اېدی.
