طالبان و پاکستان اۉرته‌سیده کینگ تۉقنه‌شوولردن کېین آتیش-کېسین کېلیشووی امضالنگن بۉلسه‌ده بیراق پاکستان تامانیدن باغلنیب قوییلگن ایکی مملکت اۉرته‌سیده‌گی چیگره‌لر هلی هم آچیلگن اېمس.
پاکستان‌نینگ «دان‌نیوز» یېتکیرمه‌سی بوگون اېرته‌لب نشر قیلگن گزارشی‌ده اوشبو چیگره‌لر قچان آچیلیشی بیللی اېمس‌لیگینی اعلام قیلدی.
اوشبو گزارش‌ده پاکستان مدافعه وزیری خواجه آصف‌دن نقل قیلیب ایتیلیشیچه، حاضر یاپیق بۉلیب کېله‌یاتکن چیگره‌لر تقدیری، پاکستان و طالبان وکیللری‌نینگ تورکیه میزبان‌لیگیده بۉلگن کېله‌سی ییغینی‌ده بحث اېتیله‌دی.
دیمک طالبان و پاکستان مدافعه وزیرلری‌نینگ دوحه‌ده امضا قیلگن کېلیشوولری اساسیده، ایکی تامان‌نینگ کېله‌سی ییغینی تورکیه میزبان‌لیگیده اۉتکزیله‌دی.
اوشبو ییغین‌ده، دوحه‌ده امضالنگن کېلیشووی عملگه آشیریلیشی تیکشیریلیشی اعلام قیلینگن.
شونینگدېک پاکستان مدافعه وزیری، طالبان بیلن بۉلگن آتیش-کېسین کېلیشووی تورکیه و قطرنینگ واسطه‌چیلیگی سبب بوتونلهی عملگه آشیریلیشی ممکن‌لیگیدن خبر بېردی.
خواجه آصف اوشبو کېلیشوو ترورچیلیککه قرشی کوره‌ش اوچون اونملی آدیم بۉلگنینی تاکیدلدی.
