طالبان‌نینگ بلخ ولایتی مرکزی مزارشریف شهریده محلی رسمی‌لری تامانیدن «امیرعلیشیر نوایی هیکلی» یۉق اېتیلیشی و بو واقعه‌دن کېین نوایی مجموعه‌سی قوریلیشی خصوصیده، طالبان وعده‌سیدن ایکی آی‌دن کۉپراق زمان اۉتماقده. بیراق بو مجموعه‌نینگ قوریلیش ایشلری قنچه‌لیک ایلگری کېتگنی هلی بیللی اېمس.
اۉزبېک تی‌وی سونگی کونلر ایچیده، بو مجموعه قوریلیش ایشلری قنچه‌لیک ایلگری کېتگنینی بیلیش مقصدیده، منبع‌لریدن هیکل قرار تاپکن محل‌ده باریب، تیکشیریش‌نی سۉره‌دی.
اۉزبېک تی‌وی منبع‌لری‌نینگ ایتیشیچه، هیکل یۉق اېتیلگن تۉرت یۉللیک اطرافی «یشیل لتته» بیلن اوره‌لگن. بیراق ایچیده قوریلیش ایشلری دوام بارمی یا یۉق می؟ بیللی اېمس.
شونینگدېک اۉزبېک تی‌وی منبع‌لری، بو ییرده حضرت نوایی خاطره‌سیگه بغیشلب قنده‌ی مجموعه قوریلیب یاتکنی هم بیللی بۉلمه‌گنینی بیلدیره‌دی.
ایتیش کېره‌ک که مجموعه اطرافیده طالبان نظارتی کوچلی بۉلگنی سبب، اۉزبېک تی‌وی منبع‌لری محل‌دن عکس و ویدیو آلیش‌ده موفق بۉلالمه‌دی.
بوندن ایلگری، طالبان اوشبو هیکل یۉق اېتیلگنیدن کېین اۉرته‌گه کېلگن کینگ تنقیدلر و اۉزبېکستان تشقی ایشلر وزیرلیگی‌نینگ اره‌لشگنی سبب، بو ییرده کورکم بیر مجموعه قوریش‌نی وعده بېریب، بو خصوصده ایش باشلنگنینی اعلام قیلگن اېدی. بیراق حاضرگچه بو ایش قنچه‌لیک ایلگری کېتگنی حقیده طالبان تفصیلات بېرگن اېمس.
