امریکا قوشمه ایالتلری‌نینگ جمهور باشلیغی دونالد ترامپ و چین جمهور باشلیغی شی جین پینگ، جنوبی کوریاده بیر-بیراوی بیلن اوچره‌شیب، تورلی مساله‌لر اینقسه ایکی تامانلمه سودا ساحه‌سیده‌گی معمالر و تارتیشوولر بۉییچه فکر المشتیردی‌لر.
امریکا و چین دولت رهبرلری‌نینگ سونگی آلتی ییل ایچیده بو ایلک اوچره‌شووی اېدی که جنوبی کوریانینگ بوسان حربی قونلغه‌سیده اۉتکزیلدی.
اوچره‌شووده دونالد ترامپ، چین جمهور باشلیغینی «ییریک دولت‌نینگ ییریک رهبری» دېب اَته‌دی و چین دولت رهبری هم اېسه دونالد ترامپ بیلن اوچره‌شوو اۉتکزه‌یاتکنیدن نهایت خرسند اېکنینی معلوم قیلدی.
اوشبو اوچره‌شوو شوندی بیرحالده اۉتکزیماقده دیر که سونگی وقتلرده، چین و امریکا اۉرته‌سیده سودا ساحه‌سیده‌گی تارتیشوولر جدی‌لشگن که بو وضعیت‌نینگ اساسی سببی امریکا تامانیدن چین محصولاتلریگه نسبتن باج‌لر آشیشی اېدی.
امریکا جمهور باشلیغی اوشبو اوچره‌شوودن کېین، ایکی تامان اۉرته‌سیده بۉلگن قریب برچه مساله‌لر حل اېتیلیب کېلیشوو قۉلگه کېلگنینی معلوم قیلدی.
ایتیلیشیچه امریکا و چین دولت رهبرلری، تعرفه تارتیشوولری، صادرات محصولاتلرینی باشقیریش، امریکاده تیک‌تاک تقدیری و شونگه اوخشش چین تامانیدن نادر عنصرلر ایشلب چیقاریلیشی مساله‌لری خصوصیده بحث قیلگن.
عینی حالده امریکا یېتکیرمه‌لری بو اوچره‌شووده، اوکراین اوروشی و تایوان مساله‌سی خصوصیده هم فکر المشتیریلگنیدن خبر بېرسه‌ده، بیراق بو خصوصده آرتیقچه تفصیلات بېریلگن اېمس.
ایتیش کېره‌ک که اوشبو اوچره‌شوو، امریکا جمهور باشلیغی‌نینگ آسیا مملکتلریگه بۉلگن سفری دایره‌سیده اۉتکزیلدی.
دونالد ترامپ بو سفری دایره‌سیده مالیزیا، جاپان و جنوبی کوریا مملکتلریدن کۉریب چیقیب، جنوبی کوریاده چین جمهور باشلیغی بیلن اوچره‌شگنیدن کېین امریکاگه قیتیب کېتدی.
