افغانستانده‌گی بیرلشگن ملتلر تشکیلاتی‌نینگ یاردم دفتری (یوناما) ایتیشیچه، عیاللرنینگ جماعت حالتی‌نینگ برچه ساحه‌لریده، جمله‌دن سیاسی ملاقاتلر و مشارکتلر مساله‌لرگه جواب بېریشده مضمونلی اشتراکی “افغانستان‌نینگ برقرارلیگی، قولب-قوتلشی و جهان میدانیده‌گی قانونی‌لیگی اوچون مهم‌دیر”.
یوناما بوگون پنجشنبه ٨-عقرب، بیرلشگن ملتلر تشکیلاتی خوفسیزلیک کېنگشی تامانیدن عیاللر، تینچلیک و خوفسیزلیک بۉییچه قبول قیلینگن ۱۳۲۵ سانلی قطع‌نامه‌نینگ ییگیرمه بېشینچی ییللیگی‌گه بغیشلنگن بیاناتیده طالبان‌نی افغانستان‌نینگ خلق ارا قانونلریده‌گی مجبوریتلریگه رعایه قیلیشگه چقیردی و “عیاللرنینگ جماعت، سیاسی و اقتصادی ساحه‌لرده تۉلیق اشتراکینی قیتریشنی” طلب قیلدی.
یوناما سیاسی اۉرین‌باسری و باشلیغی جورجت گانیون دېدی که: “افغانستانده ۱۳۲۵ سانلی قطع‌نامه تمایللری هر قچانگی‌دن هم دالضرب بۉلیب قالگن. افغان عیاللری اوزاق وقتدن بېری آغیر قیینچیلیکلرگه قرشی چیدم‌لیک، یېتکچیلیک و عجایب جسارت نمایش اېتیب کېلماقده”.
گانیون بیلدیردی که: “بو قیینچیلیکلرگه قره‌می، میلیونلب افغان عیاللری عایله‌لری اوچون مالیوی منبع‌لرنی تٲمینلش، محللرده یېتکچیلیک قیلیش، مشارکتلی یاردم کۉرستیش، باله لرنی اۉقیتیش و محلی ضدیتلرنی حل قیلیشده واسطه‌چیلیک قیلیش آرقه‌لی حرکت قیلماقده و عایله‌لرده، محله‌لرده هم مملت بۉیلب یخشی‌راق کېله‌جک اومیدینی سقلب کېلماقده”.
طالبان افغانستانده حاکمیت‌گه قیتگنیدن بویان عیاللرنینگ جمعیتده‌گی اشتراکی و فعالیتی‌گه کېنگ چېکلاولر قۉیگن.
اوشبو گروه شونینگدېک، ۶ صنفدن یوقاری قیزلرنی اۉقیتیشنی و عیاللرنینگ ایشلشینی منع قیلگن، حتی عیاللرگه مشارکتلی فعالیتلرده قتنشیش یاکه طبی یۉنه‌لیشیده تعلیم آلیش‌گه رخصت بېرمه‌یپتی.
