طالبان و پاکستان اۉرته‌سیده‌گی تارتیشوولردن کېین باشلنگن استانبول میزبان‌لیگیده‌گی مذاکره‌لر ینگی باسقیچی عرفه‌سیده، پاکستان حربی کوچلری سۉزلاوچیسی احمدشریف چودری طالبان‌نی آگاه‌لنتیرگن.
راولپندی شهریده ژورنالیست‌لر بیلن اۉتکزگن اوچره‌شووده نطق سۉزله‌گن چودری، تینچ‌لیک مذاکره‌لری نتیجه بېرمه‌گن تقدیرده، پاکستان حربی‌لری مساله‌نی حل اېتیش اوچون آدیم کوتاره‌دی دېب آگاه‌لنتیرگن.
پاکستان‌نینگ اکسپرس تریبیون یېتکیرمه‌سی خبری اساسیده، بو مملکت حربی کوچلری سۉزلاوچیسی طالبان‌گه اۉرته‌گی قرمه-قرشیلیکلرنی سۉزلشوو آرقه‌لی حل اېتیشلرینی تکلیف قیلگن.
ایتیش کېره‌ک که بوندن ایلگری، طالبان هم، افغانستان‌گه قرشی پاکستان‌نی هر قنده‌ی حربی حرکت‌نی جواب‌سیز قالدیرمس‌لیگینی بیلدیرگن اېدی.
بو مساله شوندی بیرحالده دیر که کېله‌سی پنجشنبه کونی، پاکستان و طالبان وکیللری تورکیه‌نینگ استانبول شهریده ینه بیربار اوچره‌شیب، اۉز-ارا تارتیشوولر اوچون ییچیم-یۉل قیدیریشی کوتیله‌دی.
طالبان و پاکستان وکیللری بوندن ایلگری هم بیر نیچه مراتبه استانبولده اوچره‌شدی. بیراق بو اوچره‌شوولر حاضرگچه قانقرلی نتیجه بېرمه‌گن.
ایتیلیشیچه پاکستان و طالبان اۉرته‌سیده‌گی اساسی معما، پاکستان طالبان تحریکی یا یا ده «تی‌تی‌پی» مساله‌سی دیر. پاکستان طالبان‌نی بو گروه‌دن حمایه قیلیش‌ده عیب‌لب بیراق طالبان اېسه بو ادعانی تَن آلمه‌یدی.
ایشانچ‌لرگه کۉره، طالبان‌نینگ تی‌تی‌پی بیلن سابق ده بۉلگن چوقور همکارلیگی سبب بو گروه قوله‌یلیک بیلن پاکستان بیلن مذاکره‌ده اۉز موقفی‌دن توشمس‌لیگی ممکن دیر.
