امریکا قوشمه ایالتلری یېتکیرمه‌لری تامانیدن نشر اېتیلگن خبرلرگه کۉره، بو مملکت تامانیدن غزه‌ده خلق‌ارا حربی کوچ تشکیل اېتیلیشی بۉییچه بۉلگن ریجه تیارلنگن.
ایتیلیشیچه امریکا تامانیدن تیارلنگن اوشبو ریجه، بیرلشکن ملتلر تشکیلاتی خوفسیزلیک کېنگشی‌نینگ بیر قنچه اعضالریگه هم تاپشیریلگن.
مذکور ریجه اساسیده، غزه‌ده خلق‌ارا حربی کوچلر تشکیل اېتیلیب، بو کوچلر میلادی ۲۰۲۷ – ییلگچه غزه خوفسیزلیگی همده اسراییل و مصر چیگره‌سی خوفسیزلیگینی تامین‌لشنی بوینی‌گه آله‌دی.
شونینگدېک اوشبو کوچلر یالغیز تینچ‌لیک قوریقچیلری بۉلمه‌ی، غزه ینگی حکومتی پولیس کوچلرینی تعلیم بېریش کبی اجرایی ساحه‌لرده هم حضور تاپیشی معلوم قیلینگن.
مذکور کوچلر تشکیلی‌ده، امریکا حربی‌لریگه قوشیمچه آذربایجان، قطر، مصر، بیرلشکن عرب امیرلیگی و اندونیزیادن هم حربی‌لر حضوری بۉلیشی نظرده توتیلگن.
حاضرگچه بو ریجه خصوصیده بیرلشکن ملتلر تشکیلاتی خوفسیزلیک کېنگشی‌نینگ قراری بیللی اېمس.
ایتیش کېره‌ک که بوندن ایلگری اوشبو حربی‌لر ایچیده، تورکیه حربی‌لری حضوری بارلیگی هم معلوم قیلینگن اېدی و تورکیه هم بو خصوصده حربی‌لرینی جونه‌تیشگه تیارگرلیک کۉرسه‌تدی. بیراق کۉرینیشیچه اسراییل قرشی‌لیگی سبب تورکیه حربی‌لر حضوری رد اېتیلگن و تورک دنیاسیدن بو حربی‌لر آره‌سیده آذربایجانلیک حربی‌لر حضور تاپیشی قرار قیلینگن.
