تورکستان و قطغن حدودلریده یوز بېرگن سونگی زلزله نتیجه‌سیده آغیر زیان کۉرگن قیشلاقلردن ینه بیری، سمنگان ولایتی تاشقرغان تومنی‌نینگ «ملا سعدی» قیشلاغی دیر.
اۉزبېک تی‌وی اختیاریده قرار تاپکن معلوماتلرگه کۉره، ۱۲۰ اوی‌دن عبارت بۉلگن اوشبو قیشلاقده ۸۱ اوی زلزله نتیجه‌سیده ویران‌لیککه اوچره‌گن.
منبع‌لرنینگ ایتیشیچه بو اوی‌لر جمله‌سیدن ۱۷ اوی بوتونله‌ی چوکیب ییر بیلن یکسان بۉلگن و ایچیده‌گی ایدیش‌لر و روغاز امکانیت‌لری یۉق اېتیلگن.
شونینگدېک بو قیشلاقده ۶۴ اوی هم ییر سیلکیشی نتیجه‌سیده آغیر زیان کۉریب، کۉپ قسمی ویران بۉلگن.
ایتیلیشیچه اۉزی بوتونله‌ی ییر بیلن یکسان بۉلمه‌گن اوی‌لر هم بو قیشلاقده یشش ممکن بۉلمه‌یدیکان بیر حالت‌گه توشیب قالگن و دیوارلری و تاملری چوککن.
عینی حالده اهالی قیش موسومی ییتیب کېلیشی بیلن باش پناه‌سیز قالگنلریدن خواطر بیلدیریب، احواللریگه تیزلیک بیلن اعتبار قره‌تیلیشینی سۉره‌یدیلر.
اوشبو اوی‌لرنی یقین‌دن باریب کۉزه‌تگن منبع‌لردن بیری‌نینگ اۉزبېک تی‌وی گه ایتیشیچه “بو قیشلاقده کلی زیان کۉرگن اوی‌لر شوندی که هیچ بیر نرسه اوی ایچیده قالمهگن همه‌سی و قسمی زیانلری هم شوندی که دیوارلری درز قیلگن و تاملری چوککن و ایندی یشش ممکن بۉلمه‌یدیکان بیر کۉرینیش‌ده دیر.”
بو قیشلاق اهالیسی‌دن کۉپینچه‌سی آغیر اقتصادی احواللری باعث قیته باش پناه توزاتیش اوچون امکانیت‌لری یۉق‌لیگینی بیلدیریب، بو خصوصده تېگیشلی اداره‌لر تیزلیک بیلن اعتبار قره‌تیشلری کېره‌ک دېب بیلدیره‌دیلر.
ایتیش کېره‌ک که تاشقرغان‌نینگ ملا سعدی قیشلاغی، بو تومنده زیان کۉرگن اۉنلب قیشلاقلردن بیری دیر.
