بیرلشکن ملتلر تشکیلاتی‌نینگ افغانستانده‌گی ترقیات دستوری یا ده «یوان‌دی‌پی» بو اداره‌نینگ ایکس صحیفه‌سیده بیانات نشر قیلیب، افغانستانده برق آزلیگی معماسیدن خواطر بیلدیرگن.
اوشبو تشکیلات تامانیدن نشر اېتیلگن بیاناتگه کۉره، افغانستان جمعیتی جمله‌سیدن کمیده ۸۰ فایزی ایشانچلی و دواملی برق‌گه ایگه اېمس دیر.
افغانستانده گواهی بۉلیب تورگن بو وضعیت سبب، بیرلشکن ملتلر تشکیلاتی‌نینگ ترقیات اداره‌سی، افغانستان دنیا بویلب برق معماسی بیلن جدی دوچ بۉلگن مملکتلر جمله‌سیدن دېب اعلام قیلدی.
یوان‌دی‌پی بیاناتیده، افغانستان اهالیسی برق یۉق‌لیگی باعث، اوی‌لرنی ایسیتیش مقصدیده یاغاچلردن ایش آلگنینی بیلدیریب، بو اېسه یشش محیط اوچون کتته زیان کېلتیرگنینی معلوم قیلدی.
شونینگدېک بیرلشکن ملتلر تشکیلاتی افغانستانده ساغلیق، تعلیم و سودا مرکزلریده، قیته تیکلنه‌دیگن انرژی‌دن برق ییتکزیش مقصدیده سعی‌وحرکت اېتیب تورگنیدن هم خبر بېردی.
بو تشکیلات معلوماتی اساسیده، حاضرگچه اوشبو انرژی آرقه‌لی افغانستان بویلب ۶ مینگ و ۴۶۹ مرکز برق بیلن تامین‌لنگن.
بیرلشکن ملتلر تشکیلاتی ترقیات دستوری همکارلیگیده برق بیلن تامین‌لنگن اوشبو مرکزلردن، ۵ مینگ و ۴۶۲ ته‌سی ساغلیق مرکزی، ۱۵۳ اۉقیش مرکزی و ۸۵۴ ته هم سودا مرکزی اېکن.
