جوزجان ولایتیده طالبان محلی مسووللری اۉزبېک تیلی‌گه قرشی بیر حرکت‌نی عملگه آشیریب، بو ولایت بیلیم یورتی عمومی دروازه‌سیده‌گی اۉزبېکچه یازوونی اوچیردی و اۉرنیده باشقه لوحه قوندیردی.
اوشبو حرکت کینگ تنقیدلر و ناراضلیکلرگه سبب بۉلیب، جدی مناسبت‌لرنی اۉرتهگه آلیب کېلگن که قۉییده اوشبو مناسبت‌لردن بیر قنچه‌سینی اۉقینگ!
سمنگانی: بیز گپیرگنده تعصب حرام دېیشله‌دیلر
سمنگان‌لیک یاش فعاللردن خادم اۉغلو سمنگانی، جوزجانده اۉزبېکچه یازوو یۉق قیلینیشیگه نسبتن مناسبت بیلدیریب، افغانستانده ۱۲۰ ییلدن کۉپراق زمان بۉله‌دی که اۉزبېک تیلی و مدنیتی‌گه قرشی تیزیملی سیاست‌لر باشلنگن دېب بیلدیردی.
شونینگدېک سمنگانی بوگون اعتبار قره‌تیلمه‌گنده، اېرته کېچ بۉلیشی ممکنلیگیدن هم آگاه‌لنتیرگن.
سمنگان‌لیک بو فعال، بیز گپیرگنده تعصب قیلمه‌ینگلر، تعصب اسلامگه حرام دېیشه‌دیلر دېب تنقید قیلگن.
ارباب اۉغلی: بو حرکت شوم ریجه‌لر یۉلده‌لیگیدن خبر بېره‌دی
یاش شاعر و فعاللردن عبیدالله ارباب اۉغلی، جوزجانده اۉزبېکچه لوحه یۉق اېتیلیشی اۉزبېکلرگه نسبتن شوم ریجه‌لردن خبر بېره‌دی دېب یازگن.
ارباب اۉغلی‌نینگ تاکیدلشیچه، بو حرکت هم یالغیز بیر لوحه‌نی کوتاریش اېمس بلکه اۉزبېکلر ییرلری غصب اېتیلشی و ایش‌دن بوشه‌تیلیشی کبی شوم ریجه‌لر دوامی دېب آگاه‌لنتیرگن.
شونینگدېک بو فعال، تیل و مدنیت اوچون اعتبارلی بۉلیش‌نی تکلیف قیلگن.
خیراندیش: اویغانمه‌گن خلق نابود بۉله‌دی
یاش فعاللردن نظرمحمد خیراندیش، حاضرگی کونده افغانستانده تیلی‌میز و مدنیت‌میز تقدیری‌دن اۉز خواطرینی بیلدیریب “تیلی‌میز و مدنیت‌میز تقدیری نیمه بۉله‌دی؟ شوندی اۉزلیگیمیزگه قرشی حرکتلر دوام تاپه‌می؟ دېب یازگن.
یاش بو فعال، اویغانمه‌گن خلق نابود بۉله‌دی دېب، تیل و مدنیت‌گه نسبتن اعتبارلی بۉلیش‌نی طلب قیلگن.
تیمور: حکومتده‌گی اۉزبېک عملدارلرنی تاریخ کېچیرمه‌یدی
بدخشانلیک فعاللردن مسعود تیمور، جوزجانده اۉزبېک تیلی‌گه قرشی حرکت خصوصیده، طالبان حکومتیده‌گی اۉزبېک عملدارلر جواب قیتریشی کېره‌ک دېب بیلدیرگن.
تیمور اۉزی‌نینگ یازگن بیاناتیده، اولر سکوت قیلگن تقدیرده، تاریخده اولرنی کېچیرمهیمیز دېب تاکیدلگن.
شونینگدېک بدخشانلیک بو فعال، سیزلرنینگ جهادلرینگیز تیل و مدنیت یۉق اېیتلیشیگه سبب بۉلسه، خلق سیزلرنی نیمه دېب بیلیشی لازم دېگن.
مبارز تورکستانی: تورکلرگه اونوتیلمس بیر خیانت دیر
جوزجانده اۉزبېک تیلیده یازیلگن لوحه یۉق قیلینیشیگه نسبتن مناسبت‌لر دوامی‌ده، فعاللردن ینه بیری خالمیرزا مبارز تورکستانی بو حرکت‌نی مدنیت‌میزگه قرشی همده تورکلر حقیده اونوتیلمس خیانت دېب بهاله‌گن.
تورال فاریابی: تیلی‌میزنی یۉقاتیش اوچون حرکت باشلنگن
جوزجانده بیلیم یورتی‌نینگ اۉزبېکچه لوحه‌سی کوتاریلیشیگه نسبتن یاش فعاللردن شمس الحق تورال فاریابی هم مناسبت بیلدیریب، اۉزبېک تیلینی یۉقاتیش اوچون حرکت باشلنگنیدن آگاه‌لنتیردی.
تورال فاریابی بو حقده یازگن بیاناتیده، تیل یۉقالگنده خلق یۉقالیشینی تاکیدلب، بو مساله خصوصیده جدی اعتبار قره‌تیش کېره‌کلیگینی بیلدیرگن.پ
ایلیار: اۉزبېک تیلی دیوارلرده اېمس، یوره‌کلرده دیر
جوزجانده بیلیم یورت عمومی دروازه‌سیده اۉزبېکچه لوحه کوتاریلیشیگه نسبتن مناسبت‌لر دوامی‌ده، یاش فعاللردن انعام ایلیار هم مناسبت بیلدیریب، بو حرکت‌نی قاره‌لدی.
ایلیار بو حقده یازگن بیاناتیده، اۉزبېک تیلی یالغیز دیوارلرده اېمس بلکه یوره‌کلرده یازیلگن دېب، بیلدیرگن.
صالح: تورک خلقی حنفی و ایوبی‌دن جواب سۉره‌یدی
بدخشانلیک یاش فعاللردن نجیب الله صالح، جوزجانده اۉزبېکچه لوحه یۉق اېتیلیشیگه نسبتن ناراضلیک بیلدیریب، بو حرکت خصوصیده تورک خلقی عبدالسلام حنفی و صلاح الدین ایوبی‌دن جواب سۉره‌یدی دېب یازگن.
شونینگدېک بدخشانلیک بو فعال، حکومتده‌گی بو عملدارلردن سکوت قیلمس‌لیکلرینی هم طلب قیلگن.
قبچاق: دولت‌نی بورچی تیلنی رواجلنتیرماقده دیر
جوزجانده اۉزبېک تیلی‌گه ضد حرکتگه نسبتن مناسبت‌لر دوام اېتر اېکن، فعاللردن صفی الله قبچاق هم مناسبت بیلدیریب، بو حرکت‌نی قاره‌لگن.
قبچاق‌نی تاکیدلشیچه، دولتلرنینگ بورچی تیلنی یۉق اېتیش اېمس، بلکه اسره‌ش و رواجلنتیریش دیر.
شونینگدېک یاش بو فعال، مسوول کیشی‌لردن بو مساله خصوصیده اعتبار قرهتیشلرینی سۉره‌گن.
ایلسیور: بوندی حرکتلر آلدی آلینیشی اوچون چاره کۉریلسین
یاش شاعر و یازووچیلردن تاج محمد ایلسیور هم بیر بیانات یازیب، جوزجانده اۉزبېک تیلی‌گه ضد حرکت‌نی قاره‌لدی.
ایلسیور بو حقده یازگن بیاناتیده، حاضرگی حکومت بوندی حرکتلر اۉرنیده خلق اوچون ایش زمینه‌لری یره‌تیلیشی خصوصیده فکر قیلسین دېب تاکیدلگن.
عینی حالده، ایلسیور جوزجان بیلیم یورتی لوحه‌سی قیته آلدینگی حالتیگه قیتریلیشینی تاکیدلب، ملت‌ستیزلیک بوندی حرکتلر آلدی آلینیشی اوچون چاره کۉریلیشینی تکلیف قیلگن.
