جوزجان ولایتیده اۉزبېکلرگه قرشی تعصب بۉلینیب، ولایت بیلیم یورت عمومی دروازه‌سیدن اۉزبېکچه یازوو توشیریلیشی‌دن بیش کون زمان اۉتدی. بیراق حاضرگچه بو بیلیم یورت باشلیغی انوارالحق حبیبی شامل باشقه رسمی‌لری بو خصوصده اۉزبېک خلقی‌گه بیران-بیر جواب بېریشگه تیار بۉلگن اېمس.
بوندن ایلگری جوزجان بیلیم یورتی باشلیغی، اۉزبېک تی‌وی سواللریگه قیسقه جواب یازیب، بو معمانی حل اېتیش‌گه وعده بېرگن اېدی. بیراق اوشبو قیسقه جواب‌دن کېین، بیلیم یورت باشلیغی اۉزبېک تی‌وی نینگ یازیش‌لریگه جواب قیترمه‌ی، خلق طلب‌نی اعتبارگه توتمه‌ی کېلماقده دیر.
جوزجان بیلیم یورتی باشلیغی شوندی بیرحالده اۉزبېک خلقی طلبی‌گه تَن بېرمه‌ی کېتماقده دیر که بو کیشی‌نینگ اۉزی اۉزبېک بۉلیب توریب، اۉزبېکلرگه قرشی بوندن ایش‌نی عملگه آشیرگنی جدی تنقیدلرنی اۉرته‌گه آلیب کېلگن.
عینی حالده اۉزبېک فعاللر، طالبان حکومتیده‌گی باشقه اۉزبېک عملدارلردن هم بو خصوصده سکوت قیلمس‌لیکلرینی طلب قیلماقده. بیراق بو مسووللر اېسه حاضرگچه اوشبو مساله خصوصیده بی‌فرق قالیب کېلماقده دیر.
جوزجانده اۉزبېک تیلی‌گه نسبتن بۉلینگن تعصب و بو تعصب اساسیده اۉزبېکچه لوحه روا کۉریلمه‌گنی، اۉزبېکلر برابریده آچیق دشمن‌لیک دېب تاکیدلنماقده.
اوشبو یانده‌شوو برابریده، مینگلب اۉزبېک اجتماعی صحیفه‌لرده سیس چیقاردی، بیراق طالبان صفیده‌گی اۉزبېکلر اینقسه جوزجان بیلیم یورتی مسووللری اېسه خلق‌دن یوز تارتیب، بو سیس‌لرگه اعتبار بېرمه‌ی کېلماقده دیر.
