سونگی کونلر ایچیده، فعاللر اجتماعی صحیفهلرده بیانات یازیب، اۉزبېکلر یشاوچی حدودلر اهالیسیدن آنه تیللری اوچون عملی بیر آدیم کوتاریشلرینی طلب قیلماقدهلر.
بو فعاللر، اۉزبېکلر یشاوچی حدودلر اهالیسیدن دوکانلری و کسبلری لوحهسینی اۉزبېکچه یازیشلرینی سورهشیب، اولرگه مراجعت قیلگن.
فعاللردن بیری همده اقتصادی مسالهلر بۉییچه ایش بیلرمان عتیق الله متین بو خصوصده شوندی دېب یازگن «دکان، سوپرمارکت لوحهلرینگیزنی اۉز آنه تیللرینگیزگه یازینگلر. اگر طالب بیر لوحهنی اوچیرسه مینگ لوحه یازینگلر.»
شونینگدېک یاش فعاللردن ینه بیری روحان امان قادری بو اۉزبېکلرنینگ بورچی دېب بیلدیرگن.
قادری بو حقده یازیشیچه «تورکستانده یشاوچیلر لوحهلرینی اۉزبېک تیلیده یازیشی کېرەک دیر.»
عینی حالده یاش فعال و ژورنالیست هبتالله یعقوبی هم خودی شو تکلیف بیلن خلققه یازیب مراجعت قیلگن.
اونگه کۉره «بیز تورکستان و قطغنده لوحهلرنی اۉزبېک تیلیده اوزگرتیریب اساسی بورچمیزنی بجریشمیز کېرەک.»
یعقوبی همده حاضر تیل و اۉزلیکنی رواجلنتیریش چاغی دېب تاکیدلگن. شونگه اوخشش باشقه هم بیر قنچه فعاللر، بو تکلیفنی یازگنلر.
ایتیش کېرەک که بو تکلیفلر، جوزجان بیلیم یورتی عمومی دروازهسیدن اۉزبېکچه لوحه کوتاریلیشی برابریده ناراضلیک بیلدیریلیب، بیان بۉلینماقده دیر
