امریکا قوشمه ایالتلری جمهورلیک ریاست سرایی یا ده «آق‌سرای» بیر نیچه کون‌دن بیری مهم بیر مهمان‌نی کوتیب آلیش اوچون تیارلنماقده و خبرلرگه کۉره، آق‌سرای ایریم جای‌لری بیر نیچه کون ایلگری امریکا و سعودی عربستان بیرق‌لری بیلن بیزه‌تیلگن.
امریکا قوشمه ایالتلری هر بیر مملکت و هر بیر چیت‌ایللیک مهمان‌نی هم نیچه کونلیک تیارلیک بیلن بونچه‌لیک قیزغین کوتیب آلمه‌یدی، بیراق بن سلمان‌گه کۉرسه‌تیلیب تورگن بو مهماندوستلیک بیر تاماندن دونالد ترامپ‌نینگ سعودی عربستان بیلن یخشی مناسبت‌نی بیلدیرسه‌ده و ینه بیر تاماندن امریکانینگ سعودی عربستان‌دن بۉلگن ییریک منفعت‌لری اینقسه اقتصادی منفعت‌لری مهم‌لیگینی بیلدیره‌دی.
ایشانچلرگه کۉره، امریکا و سعودی عربستان دولت رهبرلری‌نینگ بو اوچره‌شووی منطقوی احوالگه قوشیمچه، ایککی تامان مناسبت‌لری اوچون هم اوته مهم دیر.
قۉییده ترامپ و بن سلمان اوچره‌شوویدن کوتیله‌یاتکن نتیجه‌لرنی قیسقه بیر اېسلب اوتماقچن‌میز.
اقتصادی منفعت‌لر
امریکا جمهور باشلیغی و سعودی عربستان شهزاده‌سی اوچره‌شووی عرفه‌سیده نشر اېتیلگن معلوماتگه کۉره، بو اوچره‌شوو دایره‌سیده ایککی تامان اۉرته‌سیده کمیده ۸ شرطنامه امضالنیشی ریجه‌لشتیریلگن.
ایتلیشیچه اوشبو شرطنامه‌لر، مدافعه و حربی قوراللر شونینگدېک صنعی هوش و انرژی ساحه‌سیده سرمایه یاتقیزیش کبی اقتصادی ساحه‌لرگه قره‌تیلگن.
امریکا و سعودی عربستان اۉرته‌سیده‌گی اقتصادی مناسبت‌لردن کۉپراق امریکا منفعت ایزله‌ماقده دیر و بو هم دونالد ترامپ‌نینگ سعودی عربستان ییریک سرمایه‌سیگه کۉز تیککنیدن کېلیب چیقه‌دی.
ترامپ سعودی عربستان‌نینگ تیل‌دن قۉلگه کېلتیرگن پوللریدن، کۉپراق امریکاده سرمایه یاتقیزیلیش‌نی نظرده توتکنی سبب، اۉزی‌نینگ ایککینچی دور جمهورلیک ریاستی باشلنیشی‌ده، بیرینچی بۉلیب سعودی عربستانگه سفر قیلدی.
ترامپ‌نینگ سعودی عربستانگه بۉلگن سونگی سفری دایره‌سیده، امریکا جمهور باشلیغی سعودی عربستان رسمی‌لری، امریکاده ۶۰۰ میلیارد دالر ارزشیگه سرمایه یاتقیزیش‌نی وعده بېرگنینی اعلام قیلدی. بونگه قوشیمچه ترامپ بو سفری‌ده ۱۴۲ میلیارد دالرلیک قورال ساتیش کېلیشووی هم قرار قیلینگنی معلوم قیلدی. بو بیلن امریکا اۉزی‌نینگ حدودیده کتته سرمایه‌نی جلب اېتماقده و ایشلب چیقارگن قوراللری اوچون هم ییریک بیر بازار تاپیب و اولرنی ساتماقده دیر. شو مساله‌لر سبب دیر که ترامپ‌نینگ سعودی عربستانگه بۉلگن قیزیقیشینی آشیرگن.
حربی و خوفسیزلیک مساله‌لر
امریکا و سعودی عربستان اۉرته‌سیده‌گی مناسبت‌لرنی ینه بیر بۉلیمی بو حربی و خوفسیزلیک مساله‌لری دیر. سعودی عربستان، امریکاده ایشلب چیقریلگن قوراللر اوچون ییریک بازار بۉلسه‌ده بیراق قورال ساتیب آلیش‌دن کۉره کۉپراق خوفسیزلیک کفالت‌لری اوچون امریکا بیلن مناسبت‌لر کۉچه‌یتیریب کېلماقده دیر.
یقین شرق‌نینگ خوفسیزلیک احوالی آغیرلشیشی بیلن، سعودی عربستان اۉز خوفسیزلیگی اینقسه اقتصادی لایحه‌لری خوفسیزلیگی اوچون امریکا یاردمینی کوتماقده و بو خصوصده امریکادن کۉپراق ضمانت بېریشینی سۉره‌یدی دېب بیلدیرماقده خلق‌ارا مساله‌لر ایش بیلرمانلری.
ایش بیلرمانلر ایشانچی‌گه کۉره، اسراییل‌نینگ ایرانگه بۉلگن هجومی و اوندن کېین، قطرده حربی مقصدلرنی نشانگه توتیشی سعودی عربستان‌نی ایلگری‌دن کۉره کۉپراق خواطرلنتیرگن و شو سبب امریکا بیلن خوفسیزلیک کېلیشوولرینی تازه‌لش و کوچه‌یتیریش آرتیدن دیر. تا بو یۉل بیلن اۉزی‌گه قرشی اسراییل هجوملرینی برطرف اېتسه و خوفسیزلیگینی ایشانچلی‌راق تامین قیلسه.
بونگه قوشیمچه سعودی عربستان، امریکادن اف۳۵ حربی اوچاقلرنی ساتیب آلیش اوچون اولگورماقده و بو ایش عملگه آشیریلگن تقدیرده، سعودی عربستان حربی‌لری، مذکور اوچاق‌لر بیلن جهازلنگن ایلک عرب مملکتی قوشوونیگه اَیلنه‌دی.
ترامپ و بن سلمان اوچره‌شووی و یقین شرق احوالی
نشر اېتیلگن معلوماتلر اساسیده، دونالد ترامپ و محمد بن سلمان اوچره‌شووی‌نینگ کون ترتیبی‌گه کېریتیلگن موضوع‌لردن ینه بیری، بو یقین شرق احوالی اینقسه غزه کېله‌جگی و اسراییل بیلن سعودی عربستان مناسبت‌لری دیر.
دېیرلی بو اوچره‌شووده، امریکا قوشمه ایالتلری غزه تینچ‌لیگی اوچون تیارله‌گن ریجه‌سی عملگه آشیریلیشی اوچون دونالد ترامپ سعودی عربستان حمایه‌سینی طلب قیلیشی ممکن دیر.
شونینگدېک اوچره‌شووده، سعودی عربستان اسراییل بیلن دیپلوماتیک مناسبت قوریشگه قره‌تیلگن «ابراهیم کېلیشووی»گه قوشیلیشی هم بحث اېتیلیشی ممکن بۉلگن مهم مساله‌لردن باشقه بیری دیر.
دیمک بوندن بیر نیچه کون ایلگری دونالد ترامپ، سعودی عربستان بو کېلیشووگه قوشیلیش اوچون تیارگرلیک کۉرسه‌تگنینی معلوم قیلگن اېدی.
قۉلگه کېلیشی کوتیلگن کېلیشوولر برابریده‌گی معمالر
خلق‌ارا یېتکیرمه‌لر تامانیدن نشر اېتیلگن خبرلرگه کۉره، سعودی عربستان ولیعهدی امریکادن بو مملکت اختیاریده اف۳۵ اوروش اوچاقلری قۉییلیشینی طلب قیلیشی کتته احتمالی بۉلگن بیر موضوع دیر. بیراق ایشانچلرگه کۉره، امریکا قوله‌یلیک بیلن بو مهم حربی امکانیت‌نی سعودی عربستانگه ساتیب بو مملکت اختیاریده قویماقده. امریکا بو یانده‌شووی گه هم سبب اسراییل دیر.
ایش بیلرمانلرنینگ ایشانچی‌گه کۉره، امریکا قوشمه ایالتلری هیچ قچان یقین شرقده حربی نقطه‌نظردن بیر مملکت اسراییل‌دن اوستون بۉلیشینی خواهلهمیدی. شو سبب بو اوچاقلرنی قوله‌یلیک بیلن سعودی عربستان اختیاریده قۉیمسلیگی احتمالی کۉپ دیر
اقتصادی مناسبت‌لر خصوصیده هم بۉلگن معمالر، بو سعودی عربستان‌نی امریکاگه وعده بېرگن ییریک سرمایه یاتقیزیشی دیر. ترامپ‌نینگ اعلام قیلیشیچه سعودی عربستان ۶۰۰ میلیارد دالرلیک سرمایه امریکاده یاتقیزیش‌نی وعده بېرگن. بیراق حاضرگچه معلوماتلرگه کۉره، سعودی عربستان یالغیز ۲۱ میلیارد دالر سرمایه سعودی عربستان‌ده یاتقیزگن. کېله‌جکده بو رقم ۶۰۰ میلیارد دالرگه کوتاریلیشی قنچه‌لیک ممکن‌لیگی ایریم سواللرنی توغدیرگن و بو سرمایه یاتقیزیلمه‌گن تقدیرده، امریکا و سعودی عربستان اۉرته‌سیده ایشانچ‌سیزلیکلرنی آلیب کېلیشی ممکن.
خلاصه
امریکا و سعودی عربستان بیر-بیراوی‌دن کوتگن اقتصادی و خوفسیزلیک منفعت‌لری ایککی مملکت مناسبت‌لری یوقاری درجه‌ده کوچه‌یشی و ایککی تامان یقینلنیشیگه سبب بۉلگن بۉلسه هم بیراق بو کینگ مناسبت‌لر اف ۳۵ مساله‌سی کبی ایریم خواطرلر بیلن هم بیرگه دیر. امریکا جمهور باشلیغی بو اوچاق‌نی سعودی عربستان اختیاریده قوییشگه موافقت قیلگن تقدیرده، ایککی تامان مناسبت‌لری ینه‌ده کوچه‌یشی ممکن. بوندن تشقری ترامپ و بن سلمان اوچره‌شووی، غزه کېله‌جگی و یقین شرق احوالی اوچون کتته تاثیرگه ایگه دیر.
