بوگون، 18 – نوامبر اېرته‌لب قزاقستان نینگ تورکستان ولایتی جېتی سای تومنی‌نینگ الگا‌بس قیشلاغیده ایکّی قبتلی خصوصي اوی بناسیده یانغین یوز بېردی. حادثه عاقبتیده 12 کیشی هلاک بۉلگن، اولردن 9 نفری اېسه یاش باله‌لر. بو حقده « Otyrar.kz» خبر بېردی.
محلي حاکملیک معلوماتیگه کۉره، 2009، 2010، 2012، 2015، 2017، 2019، 2021 و 2024 ییللرده توغیلگن 9 نفر باله وفات اېتگن. هلاک بۉلگنلر آره‌سیده بیر عایله نینگ 5 نفر (3 قیز و 2 اۉغیل) فرزندی بۉلگن. ایکّینچی عایله‌دن اېسه2018 ییلده توغیلگن 1 ته قیز امان قالگن. شونینگدېک، 3 نفر جبرلنووچی شفاخانه‌گه یاتقیزیلگن، 2 کیشی و 1 یاش باله شفاخانه ننگ عاجل بۉلیمیده.
سارنواللیک‌گه کۉره، عایله سنت تۉی بیره‌مینی نشانله‌یاتگن بۉلگن. بیره‌م دستلب رستورانتده بۉلیب اۉتگن، کېینراق قرینداشلر اونی اویده دوام اېتتدیرگن. اېرته تانگده اویده یانغین چیققن.
تورکستان ولایتی حاکمی نورالله خان کوشېراوشبو فاجعه یوزبېرگن جاینی کۉزدن کېچیرگن، مسوول اداره‌لرگه تاپشیریقلر بېرگن و جراحتلنگنلر نینگ احوالینی بیلیش اوچون شفاخانه‌گه تشریف بویورگن.
اونینگ ایتیشیچه، یانغین سببلرینی انیقلش بۉییچه تېرگاو تۉلیق و خالصانه آلیب باریله‌دی، دفن مراسمینی تشکیل اېتیش اېسه ولایت حاکملیگی نظارتیگه آلینه‌دی.
اېسله‌تیب اۉتیش کېره‌ک که، جاري ییل نینگ 8 نوامبر کونی تورکيه نینگ کوجلی ولایتی شِمالی-غربیده عطر ایشلب چیقرووچی فابریکه‌ده کوچلی پارتلش بولگندی. حادثه عاقبتیده کمیده آلتی کیشی هلاک بۉلگن اېدی.
