امریکا جمهور باشلیغی دونالد ترمپ، ینه بیر بار ۲۸ بندلیک تینچلیک ریجه‌سینی ایلگری سوریب اوکراین‌ده‌گی اوروشنی تۉخته‌تیش اوچون حرکت قیلماقده.
بو ریجه خلق‌ارا هم جمعیتیده تورلی عکس‌العمللر بیلن یوزمه یوز بۉلگن.
اوشبو ۲۸ بندلیک حجت‌ده مسکو اوچون بیر قنچه مهم امتیازلر کۉزده توتیلگنی ایتیلماقده.
اوکراین ناتو گه اعضا بۉلیشیدن واز کېچیشی، حربی قدرتینی سېزیلرلی درجه‌ده کمه‌یتیریشی و بحثلی منطقه‌لرنینگ اَیریملری اوستیدن روسيه نینگ نظارتینی قبول قیلیشی اساسی موضوعلردن حسابلنگن.
بونینگ عوضیگه اوکراین ناتونینگ بېشینچی ماده‌سیگه اۉخشه‌ش خوفسیزلیک کفالتی پیشنهاد قیلینگن.
روسيه‌گه قۉییلگن اَیریم چېکلاولرنی کمه‌یتیریش هم رېجه نینگ بیر قِسمی.
اوکراین ترامپ‌نینگ بو ریجه‌سینی «ملی حاکمیت و امریکا یاردمی‌نینگ دوام اېتیشی اۉرته‌سیده‌گی قیین تنلاو» دېب تعریفله‌گن.
اروپا دولتلری اېسه حجتده‌گی بعضی بندلرنی اوکراین توپراغیدن واز کېچیش دېب، بو مملکتلر ریجه تیارلش جریانیده چېتگه سوریلگنینی اَیتماقده‌لر.
آلمان تشقری ایشلری وزیری یوهان وادفول بو حقده بیلدیرگن مناسبتی‌ده ایتیشیچه «آلمان بو ریجه تیارلنه‌یاتگنیده عموماً خبر قیلینمه‌گن و اونینگ اَیریم بندلری اروپا خوفسیزلیک اصوللریگه ضد.»
بعضی تحلیلچیلرگه کۉره، ترمپ نینگ غزه بۉییچه اۉتمیشده‌گی فعالیتینی حسابگه آلگنده، اوکراین‌گه عاید ینگی ریجه‌سی‌نینگ موفقیتی هم کفالتلی اېمس.
سیاسی تحلیل‌چی تیمور تورانی جنابلری‌نینگ بو حقده اۉزبېک تی‌وی گه ایتیشیچه «ترامپ حقیقتی دیگنیمیزده و اونینگ یۉلگه قۉیگن سیاستلریگه قرگنیمیزده، او، هم غزه و هم اوکراینده عملی بۉلمه‌یدگن مسئله لرنی اورته‌گه چیقارماقده. مثلن، اوکراین اروپا اتفاقی دولتلری اوچون جوده مهم بیر دولت چونکه اوییرده اروپا اتفاقی دولتلری روسیه تمانیدن تهدید حس قیلماقده‌لر و بو تهدیدنی تۉخته‌تیش اوچون قۉللریدن کېلگن بوتون دیپلوماسی یۉللرینی تطبیق قیلیشگه حرکت قیلیب کېلماقده‌لر.»
ترامپ بو ریجه‌نی «اوروشنی درحال توگه‌تیش یۉلی» دېب تعریفله‌گن بۉلسه-ده، اما اوکراین، اروپا و حتا اَیریم امریکالیک سیاستچیلر اۉرته‌سیده اوشبو ریجه جدی کېلیشماوچیلیکلرنی توغدیرگن.
اوشبو کېلیشماووچیلیکلر ترامپ‌نینگ غزه بۉییچه موفقیتسیز تجربه‌سیدن کیلیب چیقگنی ایتیلماقده.
سۉنگی خبرلرگه کۉره، اسراییل غزه شهری‌نینگ شرقی منطقه‌لریگه ینه هوا هجوملرینی باشله‌گن و آخرگی حالتده اسراییل عسکرلری غربی ساحلده جمال الطیراوی فلسطین قانونچیلیک کېنگشی اعضاسی، همده اونینگ فرزندلرینی هجوم جریانیده قۉلگه آلگن.
