نوامبر آیی‌نینگ ۲۵-سی عیاللرگه نسبتن زوره‌وانلیکلرنی توگه‌تیش خلق‌ارا کونی ییتیب کېلر اېکن؛ عیاللرگه قرشی زوره‌وانلیکلر آلدی آلینیشی مقصدیده بۉلگن ۱۶ کونلیک کمپاین باشلندی.
اوشبو کمپاین شوندی بیرحالده باشلنماقده دیر که طالبان حاکمیتیده بۉلگن افغانستانده خاتین-قیزلر احوالی و اولر دوچ بۉلگن طالبان چیکلاولری خلق‌ارا خواطرگه سبب بۉلگن.
عینی حالده، بیرلشکن ملتلر تشکیلاتی هم ۲۵ – نوامبر مناسبتی بیلن نشر قیلگن بیانات و حساباتلریده هم افغانستانده عیاللر احوالی خواطرلی بیان قیلینگن.
بیرلشکن ملتلر تشکیلاتی‌نینگ افغانستانده‌گی نماینده‌لیگی یا ده «یوناما» بو حقده نشر قیلگن حساباتیده، افغانستانده عیاللرگه نسبتن زوره‌وانلیکلر کېسکین آشگنینی معلوم قیلدی.
یوناما تامانیدن نشر اېتیلگن حسابات بیر بۉلیمیده کېلیشیچه “ایککی ییل دوامی‌ده افغانستانده زوره‌وانلیک خوفی بیلن دوچ بۉلگن خاتین-قیزلر سانی ۴۰ فایز آشگن. شوندی وضعیت که حاضر افغانستانده ۱۴.۲ میلیون عیال قوللب-قوتلنیشی ضرور دیر.”
شو بیلن بیرگه افغانستان عیاللریگه تېگیشلی ناراضلیک حرکتلر هم افغانستانده عیاللر دوچ بۉلیب تورگن وضعیت خصوصیده اعتبار قره‌تیلیشینی سۉره‌شماقده دیر.
بو حرکتلردن بیری‌نینگ اعضاسی دیبا اکبری کاکر اۉزبېک تی‌وی بیلن شریک قیلگن بیاناتیده ایتیشیچه “هر بیر خاتون عزت، مهربالیک و یشش حقوقیگه ایگه دیر. جماعت آلدیده خاتینلرگه بلند آوازگه گپیریش، توهین و تحقیر قیلیش انسان حقلرینی بوزیش دیر. بیز خاتین-قیزلر یانیده توریشیمیز کېره‌ک، کېلینگ همه‌میز زوره‌وانلیککه یۉق دېیله‌لیک.”
افغانستانده خاتین-قیزلرگه نسبتن چیکلاولر شوندی بیرحالده کوچلی دوام اېتماقده دیر که بو وضعیت خصوصیده خلق‌ارا هم‌جمعیتی‌نینگ یانده‌شووی هم تنقید اېتیلماقده.
افغانستان اۉزبېکلریدن تانیقلی عیاللر حقلری فعالی فرخ‌لقا اونچی‌زاده، بو حقده اۉزبېک تی‌وی گه شوندی دېدی “ شوندی بیر احوالده خلق‌ارا هم‌جمعیتی نینگ سکوت قیلیشی قبول قیلینمس بیر قرار دیر. سیدا کنوانسیونی یالغیز کاغذ یوزیده‌گی بیر حجت ایمس بلکه اعضا مملکتلر بجریشی شرط بولگن کیلیشوو دیر. بیز دنیا مملکتلری اینقسه سیداگه اعضا مملکتلردن ایسته‌یمیز بو خصوصده‌گی تعهدنی حمایه قیلسین‌لر تا اونی نقض قیلگنلر جوابگرلیککه تارتیلسه.”
ایتیش کېره‌ک که اۉتگن تۉرت ییل دوامی‌ده، طالبان خلق‌ارا طلب‌لرگه تَن بېرمه‌ی افغانستانده خاتین-قیزلرگه نسبتن چیکلاولرنی آشیریب کېلماقده دیر
