افغانستاننینگ تنیقلی یازوچیسی، فرهنگی شخصیت، عامهوي اخبارات واسطهلری فعالی و تعلیم ساحهسیدهگی یېتوک چهرهلریدن بیری الحاج رحمتلی استادامانالله خلیليار ۱۳۲۱- قویاش ییل ثور آیینینگ بیرینچی کونیده فاریاب ولایتینینگ پشتونکوت اولسواللیگیگه قرهشلی جمشیدي قیشلاغیده دنیاگه کېلگن. او باشلنغیچ تعلیمینی ۶-صنفگچه میمنه شهریدهگی اۉنچی ارلات اۉغیل بالهلر مکتبیده تماملهگن و سۉنگ هرات دارالمعلمینیگه قبول قیلینگن.
۱۳۴۳-ییلده اوشبو علمي مرکزنینگ ۱۲-صنفینی توگهتیب، میمنه شهریدهگی ابوعبیدجوزجانی لیسهسیده معلم صفتیده اۉقیتووچیلیک فعالیتینی باشلهگن. رحمتلی استاد خلیلیار فاریابنینگ بیرینچی مکتبلریدن بۉلمیش ابوعبیدجوزجانی لیسهسیده اۉقیتووچی بۉلگن پیتلریده یوزلب یاشلرگه استادلیک قیلیب اولرنی تربیهلب اۉشه پیت فاریاب جامعهسیگه تقدیم قیلگن اولوغ بیر انسان اېدی. اونینگ قۉلی آستیده تربیه کۉرگن شاگردلر اۉزاق ییللر فاریاب ولایتینینگ محلی حکومتدارلیگیگه دېیرلی حصّه قۉشگنلر.
رحمتلی خلیلیار کېینچهلیک بلخ ولایتیگه کۉچیب اۉتگن؛ او یېرده مزار شریفدهگی باختر لیسهسیده درس بېرگن و شو بیلن بیرگه خدمت دوامیده بلخ دارالمعلمینده اۉقیشینی تماملهیدی. شوندن سۉنگ رحمتلی خلیلیار عایلهسی بیلن کابلگه کۉچیب کېلهدی. و اۉشه یېرده تخنیک ثانوی لیسهسی، صنایع لیسهسی همده میخانیکی لیسهلریده اۉقیتووچی صفتیده فعالیت یوریتدی. شو بیلن بیرگه رحمتلی استاد امانالله خلیلیار یوقاریده ایتیلگن مکتبلرده آلیب بارگن فعالیتلری جریانیده مینگلب یاشلرنی تعلیم و تربیه ساحهسیده تربیهقیلیب یېتیشتیرگن. بو کیشینینگ قۉلی آستیده تربیه کۉرگن یاشلر اۉشه زمانده افغانستان اوچون مهم بۉلیملرده خذمت قیلگنلرینی انکار قیله آلمهیمیز.
۱۳۵۷-ییل باشیده رحمتلی استاد خلیليار افغانستان رادیوسیگه نطاق صفتیده قۉشیلدی و استه-سېکین مهم لوازملرگه اۉزبېکچه اېشیتتیریشلر بۉلیمی مدیری، عمومي اخبارات باشقرمسی مدیری، نشریات ادارهسی معاونی و نهایت افغانستان ملی رادیو و تلویزیونینینگ ولایتلر بۉییچه رئیسی اېتیب تعیینلندی. رحمتلی استاد خلیلیار عمرینینگ اساسی قسمینی اۉزبېک تیلی و فرهنگینی رواجلنتیریش اوچون بغیشلهگن بویوک بیر شخصیت اېدی.
افغانستانده هیچ بیر رادیو و تلویزیون بۉلمهگن بیر پیت رحمتلی استاد خلیلیارگه اوخشگن کورشچن شخصیتلر بیرینچی بۉلیب اۉزبېک تیلیده دستور و برنامهلر تیارلب اۉزبېکلرگه تقدیم قیلگنلر. در حقیقت خلیلیار کبی شخصیتلر بوندن یریم عصر آلدین افغانستان ملی تلویزیونیده اۉزبېک تیلیده گپیریش بیلن اصلی مبارزهنی باشلب تیلنی رواجلنتیریش یۉلیده کورشگنلر. اولرنینگ کورهشی نتیجهسی دیرکه بوگون اۉزبېکلر جامعهسیده یوزلب ژورنالیست دولتی همده خصوصی عاموی اخبارات واسطهلریده فعالیت قیلهدیلر.
رحمتلی خلیلیار تقاعدگه چیقونیگه قدَر اوشبو لوازمده ایشلب، مملکتنینگ عامهوي اخبارات واسطهلریگه بېبها خدمتلر کۉرستدی. اولرنینگ اۉزبېک تیلنی رواجلنتیریش اوچون آلیب بارگن کورهشلرینی حاضرگی اولاد همده کېلهجک اولا اونوتهآلمهیدی اصلا.
رحمتلی الحاج استاد امانالله خلیلیار تقاعدگه چیققندن سۉنگ اۉن ایکّی ییل دوامیده «آیینه» رادیو و تلویزیونی نشریات باشلیغی صفتیده فعالیت یوریتدی و اۉزبېک عامهوي اخبارات واسطهلرینینگ رواجیگه مهم حصه قۉشدی. رحمتلی نهفقط موفقیتلی معلم و باشقرووچی اېدی، بلکه یازووچی، ژورنالیست، نطاق و دکلماتور صفتیده هم مملکتنینگ مدني خاطرهسیده اۉچمس ایز قالدیردی.
رحمتلی استاد امانالله خلیلیار افغانستان اۉزبېک مطبوعاتی بۉییچه بیرینچی و ایلغار ژورنالیستلردن حسابنلهدی. او کیشی اۉزینینگ ثمرهلی حیاتی جریانیده یوزلب سیاسی و فرهنگی مقالهلرنی یازیب نشر قیلگن. رحمتلی خلیلیار جنابلری یریم عصر مطبوعات ده فعالیت قیلگن اولوغ شخصیتلریدن بیری بۉلیب، اۉزبېک تیلی و مدنیتینی رواجلنتیریش اوچون جان و دلدن کورشگن بویوک انسانلردن اېدی.
او، اۉزینینگ بوتون عمریده اینیقسه افغاستان ملی رادیو تلویزیونینینگ تورلی لوازملری و ینه آیینه خلق ارا تلویزیونی نشرات باشلیغی بولیب خذمت قیلگن پیتلرده یوزلب ژورنالیستنی خبرنگارلیک ساحهده تربیه بۉلیشی اوچون کتّه همکارلیک قیلیب اولرگه استاد بۉلگن.
رحمتلی خلیلیارنینگ اتاقلی یازووچی صفتیده اۉنلب سیاسی تبصرهلری آیینه خلق ارا تلویزیونی ترماغی آرقهلی نشر اېتیلگن. او کیشیده تلویزیونی سیاسی تبصره یازیشده علیحده بیر استعداد بار اېدی. رحمتلی خلیلیار صاحب فقط بیر یازوچی، فرهنگی و ژورنالیست بولمهی سیاسی بیر سیما هم بۉلگن. او کیشی افغانستان ملی اسلامی جنبش حزبینینگ کابل ولایتینینگ ولایتی کېنگش باشلیغی بۉلگن.
بوندن تشقری رحمتلی افغانستان ملی اسلامی جنبش حزبینینگ مرکزی کېنگشی سیاسی کمیتهسینینگ هم اعضاسی بۉلیب فعالیت قیلگن.
رحمتلی خلیلیار یاشلرنینگ اۉز آنهتیلیده اۉقیش و یازیشده تشویق قیلیب کېلگن مهم سیمالردن اېدی. او کیشی فعال بیر فرهنگی صفتده کابلده اوتکزیلگن فرهنگی و ادبی محفللرده هر بیر مهماندن کۉره آلدین کېلیب اشتراک قیلردی. رحمتلی خلیلیارگه قۉنغیراق قیلیب، جناب استاد یاشلری آرقهلی منه بو آدرسده بیر فرهنگی برنامه اۉتکزیلماقچی خبرسیز قالمنگ احوال بېریلسه، خوش بۉلهدی دېب آچیق پیشانه بیلن قبول قیردیلر. او کیشی فرهنگی برنامهلرگه شونچهلیک قیزیقیش بیلن اشتراک اېتر اېدیکه یازنینگ ایسیغی و قیشنینگ قهرتان ساووغی بۉلیشیدن قطع نظر برنامهلرده فعال حصه قۉشردی.
شونینگدیک رحتملی استاد خلیلیار فعال بیر اجتماعی شخصیت اېدی. او کابلدهگی فاریابلیکلر شوراسینینگ فعال اعضالریدن ایدی. رحمتلی خلیلیار شورانینگ فعال بیر اعضاسی صفتیده هر دایم قۉللریدن کېلگن خذمتنی بجریش اوچون تیار ایدی. کابلده یشاېچی فاریابلیکلرنینگ یخشی و یامان کونلریده فاریابلیک باشقه شخصیتلر بیلن هر دایم اېلینینگ یانیده اېدی. عمومن آلگنده جناب رحمتلی خلیلیار هم فرهنگی، هم اجتماعی و سیاسی میدانده فعال بیر تاثیرلی کیشی اېدی. او نهایت تیناوون پایتخت کابلنینگ شفاخانهلریدن بیریده حیاتدن کۉز یومدی. روحلری شاد بۉلسین!
