بیرلشکن ملتلر تشکیلاتی نینگ عیاللر بۉلیمی طالباندن عیال خادملر نینگ بیرلشکن ملتلر تشکیلاتی ادارهلریگه کیریش تعقیقینی بېکار قیلیشنی سۉردی، شونده یاردم عیاللر و قیزلرگه یېتیب باریشی ممکن.
تشکیلات بوگون (یکشنبه 16-قوس بیانات چیقریب، اوچ آیدن بېری بیرلشکن ملتلر تشکیلاتی نینگ بوتون مملکت بۉیلب بنا و ادارهلریگه عیال خادملر نینگ کیریشی تعقیقلنگنینی بیلدیردی.
بیرلشکن ملتلر تشکیلاتی نینگ افغانستاندهگی عیاللر بۉلیمی مخصوص نمایندهسی سوزان فرگوسن ، اۉتگن 91 کون دوامیده عیال خادملر اۉز اویلریدن افغانستانلیکلرگه ضرور بۉلگن خدمتلرینی دوام اېتتیریشماقده لر دېدی.
اونینگ قۉشیمچه قیلیشیچه، افغانستان عیاللری بیرلشکن ملتلر تشکیلاتی نینگ افغانستانده فعالیت یوریتیشی اوچون ضرور بۉلیب، فقط اولر آرقهلی بیرلشکن ملتلر تشکیلاتی عیاللر و قیزلرگه بېواسطه یېتیب باریب، اولرگه یاردم کۉرسهته آلهدی.
بیرلشکن ملتلر تشکیلاتی اوشبو رسميسی نینگ تأکیدلهشیچه، یاردم عیاللر تامانیدن و عیاللرگه یېتکزیلیشی شرط.
تشکیلات طالبان نینگ چېکلاولریگه قطعا قرشی اېکنینی ایتدی. چونکه بوندهی چېکلاولر بیرلشکن ملتلر تشکیلاتی نظامیده قید اېتیلگن اساسي انسان حقوقلری و تېنگلیک تمایللرینی بوزهدی همده تشکیلات نینگ وظیفهلرینی بجریش امکانیتینی ضعیفلشتیرهدی.
تشیکلات نینگ عیاللر بۉلیمی نماینده سی شوندهی دېدی، «بیز افغانستان عیال خادملر و ایشلاوچیلری نینگ بیرلشکن ملتلر تشکیلاتی حدودیگه کیریش تعقیقی بېکار قیلینیشینی و اولرنینگ ادارهلرگه خوفسیز کیریشیگه شرایط یرهتیلیشینی طلب قیلهمیز، شونده یاردم اېنگ کۉپ محتاج بۉلگن عیاللر و قیزلرگه یېتیب بارهدی.»
طالبان اوچ ییل آلدین نادولت تشکیلاتلر، جملهدن بیرلشکن ملتلر تشکیلاتیده عیاللر نینگ ایشلشینی تعقیقلهگن اېدی. طالبان حاکمیتگه قَیتگن بیرینچی کونده اېسه عیاللر نینگ دولت ادارهلریده ایشلشی منع قیلینگن اېدی. شونگه قرهمهی، عیاللر بیرلشکن ملتلر تشکیلاتی ادارهلریده و اَیریم یاردم تشکیلاتلریده ایشلشنی دوام اېتتیریشگن.
بیرلشکن ملتلر تشکیلاتی نینگ افغانستاندهگی یاردم ادارهسی یاده (یوناما) سپتمبرآییده طالبان عیال خادملر نینگ بیرلشکن ملتلر تشکیلاتی ادارهلریگه کیریشیگه تۉسقینلیک قیلهیاتگنینی اعلام قیلگن اېدی.
تشکیلات بو تعقیقنی تصدیقلب، طالباندن اوشبو چېکلاونی بېکار قیلیشنی سۉرهگن.
بیرلشکن ملتلر تشکیلاتی، عیال خادملر نینگ کیریشی تعقیقلنگندن سۉنگ، افغانستاندهگی بیرلشکن ملتلر تشکیلاتی آژانسی، جمغرمهلری و تشکیلاتلری اۉز عملي دستورلرینی اۉزگرتیریشگه مجبور بۉلگن و حاضرده عملیاتلرنی دوام اېتتیریش اوچون ماس وریانتلرنی کۉریب چیقماقدهلر دېب معلوم قیلگن.
