بیرلشگن ملتلر تشکیلاتیده افغانستان نمایندهلیگینینگ باشلیغی نصیر احمد فایق چهارشنبه کونی خوفسیزلیک کېنگشی مجلسیده مملکت بحرانینی «بوتونلهی سیاسي» دېب اتهدی و اونینگ یېچیمی صفتیده ملي بیرلیکنی، سیاسي برقرارلیکنی و قانوني ترتیبنی تأمینلهیدیگن کېنگ قمراولی حکومت نینگ شکللنیشی لازملیگینی تأکیدلهدی.
او شونینگدیک، خلق ارا همجعیت اۉز موقعیدن و موجود واسطهلریدن فایدهلنیب، طالباننی سیاسي مذاکرهلرنی قبول قیلیشگه و «افغانستان خلقینی نمایندهلیک قیلووچی قانوني کوچلر» بیلن اۉتیریشگه اوندهشی کېرهک دېدی. فایقنینگ سۉزلریگه کۉره، بیرلشگن ملتلر تشکیلاتی نظارتی آستیده بوندهی جریان باشلنیشی حاضرگی مرکّب وضعیتدن چیقیش نقطهسی بۉلهدی.
فایقنینگ قۉشیمچه قیلیشیچه، دوحه جریانی هم برچه ایشانچلی تامانلر، جملهدن طالبان، عیاللر، مدنی جماعهچیلیک و یاشلرنی اشتراک اېتیشیگه یۉل آچهدیگن حقیقي سیاسي جریاننی باشلش اوچون امکانیت یرهتیشی کېرهک. بو جریان رمزي یاندشووگه ایلنمسلیگی یاکه بیر تمانلمه حکومتنی بالواسطه تصدیقلش صفتیده قبول قیلینمسلیگی لازم.
افغانستان نمایندهسی، بیرلشگن ملتلر تشکیلاتینینگ افغانستاندهگی یاردم ادارهسی (یوناما) سیاسي توزیلمهوي مذاکرهلرنی آسانلشتیریشده مهم رۉل اۉینهیدی دېب ایتدی.
او شونینگدېک، بیرلشگن ملتلر تشکلاتی باش کاتبینینگ مخصوص نمایندهسینی افغانستانگه چوقور توشونچهگه اېگه، انسان حقوقلری و بیرلشگن ملتلر تکشیلاتی نظامیگه تۉلیق صادق بۉلگن شخص صفتیده تعیینلش ضرورلیگینی تأکیدلهدی.
فایق، افغانستان حل قیلووچی باسقیچده توریبدی و مملکت اهالیسی، خصوصاً عیاللر، اۉنلب ییللر دوامیده مجبورن اوروش، تیزیملی چېکلاولر، قۉرقوو، قشّاقلیک و جاییدن کۉچیریش کبی عذابلرنی باشدن کېچیرگن، لېکن شجاعت، امید و چیدملیلیک بیلن توریبدی دېنه تاکیدلهدی.
اونینگ کۉپهیتیریشیچه، افغانستان اهالیسی اۉز حقوقلری و مملکت همده خلق ارا همجميعتدهگی موقعینی حمایه قیلیشنی طلب قیلماقده.
