هر کیم نینگ اۉزیگه یرهشه قۉرقهتورغن نرسهسی بۉلهدیر. «ایشتانسیزنینگ چۉپدن حدوگی بار»، دېگندېک، شو وقتده ایشتانلیک انسان، حدوکسیز آدم احتمال یۉقدیر. تورکستان ایستهتیستیقه ادارهسی نینگ کېینگی ییقغن حسابیگه قرهغنده، ایشتانسیزلر بنعجی[1] کۉپهییبدیرلرکی، بیز اولرنی عیناً قوییده کۉچیرهمیز:
مستملکهچی اچچیغلنگن چاغیده سِری نینگ آچیلیشیدن قۉرقهدیر.
هر تورلوک اداره مدیرلری سیلاو یقینلشسه منصبدن توشیب قالیشدن قۉرقهدیرلر.
ینگی کۉز آچقن حسابسیز اۉزبېک شاعرچه و شاعرهچهلری مینگ مشقت بیلن عذابلنیب یازغن شعرلری نینگ گزېتهلرده باسیلمهی قالیشیدن قۉرقهدیرلر.
توتهنتیروقسیز مقاله یازیشغه اۉرگنگن محررلر تۉسوندن تېگیب قالهتورغن تنقید کلتهگیدن قۉرقهدیرلر.
بای و سوداگرلر، اینیقسه بولر نینگ قۉرقونچلری پایانسیزدیر…
چنانچی: دوکان سوداسی یقینلشسه، اجارهنی آشیریب یوبارهتورغن یکنچیلردن[2] قۉرقهدیرلر، قۉللریغه کۉپراق پول ییغیلیب قالسه، ماللر آشیب، پول قورسینینگ توشیب کېتیشیدن قۉرقهدیرلر، قۉلیده انچهیین کاغذ کۉترگن کیشینی کۉرسهلر «تارغوای نلۉگ» توشماغیدن قۉرقهدیرلر، رۉزه آیی کیریب زکات بېریش اېسکه توشسه، ماللر حسابینی آلیشدن قۉرقهدیرلر… هر حالده بو دُرکوم خلق اوچون یېر هم قۉرقونچ، کۉک هم قۉرقونچ. فقط قارا یېر نینگ آستیغاینه تینچدیر!
کمبغل دهقان و ایشچیلر، کون سیین بازار بهاسی نینگ بیرگه بیر کۉتریلیشیدن قۉرقهدیرلر.
حکومت ادارهلریدهگی پارهخۉرلر، پارهخۉرلیق بیلن کورهش باشلنغندن بېری اۉزلری نینگ سایهلریدن هم قۉرقهدیرلر.
کۉکدهگی بولوتلر، یاغمهی دېسه خدا نینگ بویروغیدن، یاغهی دېسه یېردهگی مخلوقلرنینگ چیرتینگ-پیرتینگیدن قۉرقهدیرلر.
اۉزبېک خاتونلری، اېرلری نینگ کلتهگیدن، قیزلری کۉچهگه چیقهی دېسه آنهلری نینگ تورتوگیدن قۉرقوب، پېسلر ماخاودن، ماخاولر پېسدن، اجیوهلر ترهلهدن، ترهلهلر اجیوهدن؛ قیسقهسی کتّه-کیچیک، یسّی-یپسقی، قینغیر-قییشیق، اوزون-قیسقه همهلری هم قۉرقاقدیرلر…
من نیمه و کیمدن قۉرقهمن؟
اینیقسه، منیم ایشیم جوده هم قیین: یازهی دېسهم، آشنا-آغهینی نینگ شۉر تومشوقلیغیدن، یازمهی دېسم «موپگگوم» پاچّه(یزنه) نینگ جېکیریگیدن قۉرقهمن.
ینه بوندن باشقه قۉرقهتورغن ایکیر-چیکیرلریم:
اېسکی شهر کۉچهلریدن یورسهم، بېتیمگه لای سچرهشیدن قۉرقهمن.
یاغمور یاققن کونلریده اېسکی شهر رستهلری نینگ اغنهب کېتیشیدن، سوداگرلر نینگ تۉنگغوز قۉپیشیدن قۉرقهمن.
بیلیم یورتلری یانیدن، باشلنغیچ مکتبلر قرشیسیدن اۉتوب قالسهم، استقبالدهغی الویر-شلویر اۉزبېک مدنیتیدن قۉرقهمن!
هر حالده منیم هم قۉرقونچلریم اۉزیمگه یېترلیک…
