ماینلردن ضرر کۉرگن افغانستانلیکلر انستتیوتی (آلسو) حساباتیگه کۉره، افغانستان 2024 ییلده میانمار و سوريهدن کېین دنیا بۉییچه ماین پارتلشلری عاقبتیده اېنگ کۉپ قربان قید اېتیلگن دولت بۉلگن.
مذکور مؤسسه پنجشنبه کونی، 20- قوس اعلام قیلگن حساباتیده 2024 ییل 1-جنوریدن دسمبر آیی نینگ آخریگچه افغانستانده 624 کیشی ماین پارتلشلری عاقبتیده هلاک بۉلگنی یاکه جراحت آلگنینی معلوم قیلگن.
حساباتده ایتیلیشیچه، اۉتگن ییلده هر آی اۉرتهچه 52 کیشی ماین پارتلشلری سببلی هلاک بۉلگن یاکه تن جراحتی آلگن.
حساباتگه کۉره، افغانستان ساغلیقنی سقلش خدمتلری ساحهسیده کېنگ کۉلملی اوزیلیشلرگه دوچ کېلهیاتگن دولتلر قطاریگه کیراهدی.
حساباتده تأکیدلنیشیچه، 2030 ییل مارچ آییگچه افغانستان «پیادهگه قرشی ماینلر»دن تۉلیق تازهلنیشی لازم.
شونینگدېک، حساباتده افغانستانده ماین پارتلشلری عاقبتیده یرهلنگن و معلول بۉلیب قالگن شخصلر کۉپلب معمالرگه دوچ کېلهیاتگنی همده جدّي یاردم و قۉللب-قوّتلشگه محتاج اېکنی قید اېتیلگن.
ماینلردن ضرر کۉرگن افغانستانلیکلر انستتیوتی معلوماتیگه کۉره، 2024 ییلده 52 مملکتده جمعی 6 279 کیشی ماین قربانی بۉلگن بۉلیب، بو سۉنگّی تۉرت ییل ایچیده قربانلر سانی نینگ آشگنینی کۉرسهتهدی.
بو حالت شوندهی بیر پیتده یوز بېرماقدهکه، بیرلشگن ملتلر تشکیلاتی یقینده افغانستانده ماینلرگه قرشی کورهش دستورلری بودجهسی نینگ قیسقریشی تینچ اهالی اۉرتهسیده قربانلر سانی نینگ تاباره آرتیشیگه آلیب کېلهیاتگنی حقیده آگاهلنتیرگن اېدی.
بیرلشکن ملتلر تشکیلاتی اعلام قیلگن حساباتده هر آی افغانستانده چمهسی 54 کیشی اوروشدن قالگن ماینلر پارتلشی عاقبتیده هلاک بۉلهیاتگنی و مملکت هنوز دنیادهگی اېنگ یوقاری ماین قربانلری کۉرستکیچیگه اېگه دولتلر قطاریده قالهیاتگنی ایتیلگن
