سونگی بیر یریم آی دوامیده فاریاب، جوزجان، سمنگان، بدخشان، سرپل و هرات ولایتلریده یوز بېرگن ۱۴ ترافیکی حادثه نتیجهسیده اۉنلب کیشی اۉلیب و یرهلنگن.
اۉزبېک تیوی تیکشیرووی اساسیده، اوشبو مدت ایچیده، مذکور ولایتلرده یوز بېرگن تورلی ترافیکی حادثهلر نتیجهسیده ۲۸ کیشی جان بېریب و ینه ۵۶ کیشی یرهلنگن.
واقعهلردن کۉپینچهسی فاریاب ولایتیده یوز بېرگن که نشر اېتیلگن معلوماتلرگه کۉره، اۉتگن بیر یریم آی ایچیده فاریاب ولایتیده بیش واقعه یوز بېرگن که بو واقعهلر نتیجهسیده ۱۶ کیشی جان بېرگن و ۳۰ کیشی هم یرهلنگن.
اۉتگن بیر یریم آی ایچیده یوز بېرگن ترافیکی حادثهلردن ینه کۉپینچهسی سمنگان ولایتیده یوز بېرگن که بو ولایتده یوز بېرگن حادثهلر جملهسیدن اۉزبېک تیوی اوچ حادثهنی تیکشیرگن که نتیجهده تۉرت کیشی جان بېرگنی و ینه ۱۳ کیشی یرهلنگنی انیقلنگن.
شونینگدېک جوزجان و بدخشان ولایتلریده هم بو مدت ایچیده، هر بیریده ایککی علیحده ترافیکی حادثه یوز بېریب اهالیدن قربانلیک آلگن.
اوشبو مدت ایچیده جوزجانده یوز بېرگن ترافیکی حادثهلرده، ۴ کیشی جان بېریب و ۲ کیشی یرهلنگن، بدخشانده هم اوچ کیشی جان بېریب و ینه ۹ کیشی یرهلنگن.
عینی حالده اۉزبېک تیوی بو مدت ایچیده سرپل و هرات ولایتلریده یوز بېرگن ایککی حادثهنی هم تیکشیرگن که نتیجهده بیر کیشی جان بېریب و ینه ایککی کیشی یرهلنگن.
اوشبو واقعهلر، افغانستان بویلب ترافیکی حادثهلر سانی کۉپهیگن بیرحالده یوز بېرگن که بو واقعهلر اهالیدن قربانلیک آلماقده دیر.
بو حقده نشر اېتیلگن معلوماتلرگه کۉره، یۉللر بوزوقلیگی، هیداوچیلرنینگ احتیاطسیزلیگی همده ترافیکی قاعدهلر نظرده توتیلمسلیگی بو واقعهلر یوز بېریشی اساسی سببلری دیر.
دیمک افغانستان تورلی حدودلریده، ترافیکی حادثهلر سانی کۉپهییب اهالیدن قربانلیک آلیشی کینگ خواطرلرنی هم اۉرتهگه آلیب کېلگن.
اېسلش کېرهک که بو مدت ایچیده یوز بېرگن ترافیکی حادثه سانی بو ییردن توپلنگن حادثهلر سانیدن کۉپ دیر و افغانستان تورلی ولایتلر بو مدت ایچیده باشقه هم اۉلیملی حادثهلر گواهی بۉلگن.
