نشر بۉلینگن خبرلرگه ایتیلیشیچه، طالبان ایچکی ایشلر وزیرلیگی نینگ خوفسیزلیک بۉییچه معاونی ابراهیم صدر اوشبو ولایتگه سفر قیلگن و بوگون دوشنبه، 24- قوس طالبان منصبدارلری بیلن خوفسیزلیک ییغیلیشینی اۉتکزگن.
نشر بۉلگن خبرلرگه کۉره، اوشبو ییغیلیش مخفي طرزده و کوچهیتیریلگن خوفسیزلیک چارهلر آستیده پنجشیر ولایتی طالبان حاکمی ادارهسیده بۉلیب اۉتماقده.
خبرلر اساسیده، طالبان کوچلری پنجشیر ولایتی حاکملیگی تامان آلیب بارووچی یۉلنی اهالی و دولت ادارهلریگه مراجعت قیلووچیلر اوچون یاپیب قۉیگن.
بو ییغیلیش «افغانستان ملي جبهسی» تامانیدن پنجشیردهگی طالبان قرارگاهیگه قیلینگن هجومدن تخمیناً بیر هفته اۉتیب اۉتکزیلماقده.
«افغانستان ملي جبههسی» اۉتگن هفته اۉز کوچلری تامانیدن دره تومنی نینگ عبدالله خیل دره تومنیده جایلشگن طالبان قرارگاهیگه قیلینگن هجومده اوشبو گروه نینگ 17 اعضاسی اۉلدیریلگنینی دعوا قیلگن اېدی. طالبان نینگ محلي رسميلری بو دعوانی رد اېتگن.
خبرلرگه کۉره، ابراهیم صدر کېچه کېچقورون پنجشیر ولایتیگه یېتیب کېلگن و طالبان عمومي یۉلنی ترانسپورت قتناوی اوچون یاپگن.
خبرلرده ایتیلیشیچه، ابراهیم صدر نینگ پنجشیرگه سفری مقصدی خوفسیزلیک حالتینی اۉرگنیش و قیش فصلیده طالبانگه قرشی قوراللی مخالفلر حرکتلری نینگ آلدینی آلیشدن عبارت.
پنجشیر ولایتی کابل نینگ شِمالیده جایلشگن بۉلیب، قیش موسمیده ساووق و قارلی آب-هواگه اېگه.
نشر بۉلگن خبرلرگه کۉره، طالبان نینگ کۉپلب پُستلری تاغلی حدودلرده جایلشگن و ساووق موسمده اوشبو گروه کوچلری جدّي قیینچیلیکلرگه دوچ کېلهدی. بو حالت طالبانگه قرشی کوچلر اوچون قولهی امکانیت یرهتهدی.
