خلقارا مهاجرت تشکیلاتی جهان مهاجرلر کونی مناسبتی بیلن، حاضرده تخمیناً 304 میلیون کیشی، یعنی دنیا اهالیسی نینگ قریب 4 فایزی توغیلگن مملکتیدن تشقریده یشیدی دېب معلوم قیلگن.
تشکیلات نینگ ایتیشیچه، مهاجرلر سانی ایزچیل آشیب بارماقده، چونکه آدملر ایش، خوفسیزلیک، تعلیم و عایله سببلی مهاجرت قیلماقده.
خلق ارا مهاجرت تشکلاتی باش مدیری ایمی پوپ مهاجرتنی ینه بیر بار امکانیتلر، انساني ترقیات و عمومي رواجلنیش حکایهسی صفتیده تعریفلب، حرکتدهگی آدملرنی حمایه قیلهدیگن و اولرنی قبول قیلهیاتگن جمعیتلرنی قۉللب-قوّتلهیدیگن ینه-ده کوچلی و برقرار مهاجرت تیزیملری ضرورلیگینی تأکیدلهدی.
اونینگ ایتیشیچه، مهاجرلر یشب و ایشلهیاتگن جمعیتلرگه کۉپلب یۉللر بیلن حصه قۉشهدی. ملَکه، ایجادکارلیک و تدبیرکارلیک آلیب کېلهدی و بو محلي اقتصادیاتلرنی مستحکملهیدی.
ایمی پوپ نینگ سۉزلریگه کۉره، ایش مهاجرتی ساغلیقنی سقلش، قوریلیش، زراعت و تکنالوژي کبی مهم ساحهلرنی قۉللب-قوّتلهیدی همده اهالیسی قریب بارهیاتگن مملکتلر اوچون مهم یاردم کۉرسهتهدی.
شو بیلن بیرگه، اونینگ تأکیدلشیچه، تاباره کوچهییب بارهیاتگن معمالر و بحرانلر آدملرنی مهاجرتگه مجبور قیلماقده.
خلق ارا مهاجرت تشکیلاتی معلوماتیگه کۉره، ۲۰۲۴-ییل آخریگه کېلیب،۸۳.۴میلیون کیشی ماجرا، زۉروانلیک و طبيعي آفتلر سببلی اۉز مملکتی ایچیده مجبوري کۉچیشگه مجبور بۉلگن.
شونینگدېک، کۉپلب مهاجرلر چېگرهلردن اۉتیشده، اینیقسه قانوني و ترتیبلی یۉللر چېکلنگن منطقهلرده، جدّي خوفلرگه دوچ کېلماقده. بو خوفلر قطاریگه دېنگیز و چۉللردن خوفلی اۉتیش، سوءاستعمال، همده یاردم و حمایهگه چېکلنگن کیریش کیرهدی.
تشکیلاتگه کۉره، اۉرته یېر دېنگیزی هنوزگچه دنیادهگی اېنگ خوفلی مهاجرت یۉنهلیشلریدن بیری بۉلیب قالماقده؛ 2014-ییلدن بویان بو حدودده۳۳ مینگدن آرتیق اۉلیم حالتی قید اېتیلگن.
دنیا بۉیلب مهاجرلرنینگ نینگ مهم قِسمینی افغانستان یشاوچیلری تشکیل اېتهدی. بېقرارلیک، قشّاقلیک و ایشسیزلیک میلیونلب افغانلرنی مهاجرتگه مجبور قیلگن
