جهان ساغلیقنی سقلش تشکیلاتی (WHO) 2025-ییلده افغانستانده سیل (توبرکلوز) کسللیگینی بهالش بۉییچه تېکشیریش اۉتکزگنینی معلوم قیلدی.
مذکور تشکیلات یکشنبه کونی، 30 – قوس، ایکس اجتماعي ترماغیده یازیشیچه، اوشبو تېکشیروو ملي سیل دستورینی بهالش و ملي همکارلرنی قۉللب-قوّتلش، شونینگدېک بو کسللیککه قرشی کورش دستورلرینی کوچهیتیریش مقصدیده عملگه آشیریلگن.
تشکیلات نینگ معلوماتیگه کۉره، اونینگ متخصصلری کابل، بلخ، ننگرهار، قندهار و هرات ولایتلریگه تشریف بویوریب، سیلگه قرشی کورش حالتینی اۉرگنیشگن.
جهان ساغلیقنی سقلش تشکیلاتی قۉشیمچه قیلیشیچه، اوشبو بررسی نتیجهلری 2026–2030-ییللرگه مۉلجللنگن سیل دستورینی ایشلب چیقیشده یاردم بېرهدی و برچه اوچون سیل بۉییچه خدمتلردن عدالتلی و ثمرهلی فایدهلنیش امکانینی یرهتهدی.
تشکیلات تأکیدلشیچه، قۉشمه سعی-حرکتلر آرقهلی افغانستان سیل کسللیگینی یۉق قیلیشگه ینهده یقینلشماقده.
شو بیلن بیرگه، طالبان ساغلیقنی سقلش وزیرلیگی آلدینراق جهان ساغلیقنی سقلش تشکیلاتی معلوماتلریگه اساسلنیب، افغانستانده هر ییلی چمهسی75 مینگ کیشی سیل کسللیگیگه چهلینیشینی معلوم قیلگن اېدی.
