خلقارا قیزیل خاچ کمیتهسی افغانستان هنوزگچه دنیادهگی اېنگ آغیر بشردوستانه سیناولردن بیریگه دوچ کېلهیاتکنینی بیلدیردی.
مذکور تشکیلات بوگون دوشنبه، ۱- جدی اعلام قیلگن حساباتیده چېکلنگن تیریکچیلیک منبعلری، دایمی ایشسیزلیک و ساغلیقنی سقلش خذمتلریگه چېکلنگن کیریش امکانیتی کۉپلب عایلهلرنی امان قیلیش چېگرهسیگه آلیب کېلگنینی تٲکیدلهدی.
شونینگدېک، تشکیلات زلزله، قورغاقچیلیک، سوو تاشقینلری و اقلیم اۉزگریشی اېکینچیلیک محصولاتلرینی یۉق قیلگنی، عایلهلرنی کۉچیشگه مجبور اېتگنی، اوی-جایلر و مهم زیرساختلرگه ضرر یېتکزگنی، آزیق-آوقت خوفسیزلیگینی ینه-ده یامانلشتیرگنی، محلي جواب بېریش امکانیتلرینی چېکلهگنی و احتیاجلرنی کوچهیتیرگنینی قید اېتدی.
خلق ارا قیزیل خاچ کمیتهسی افغانستانلیکلرنینگ ایران و پاکستاندن چیقریب یوباریلیشی مسألهسیگه هم تۉختهلیب، اولرنینگ قَیتیشی ساغلیقنی سقلش، سوو، آزیق-آوقت و باشقه خدمتلرگه باسیمنی آشیرگنینی ایتدی.
تشکیلات عمومي حالده افغانستاندهگی بشردوستانه معمالر اقتصادي بېقرارلیک، اقلیم ضربهلری، مجبوري کۉچیش، اقتصادي چېکلاولر و خلق ارا همکارلیکنینگ کمهییشی بیلن باغلیقلیگینی تأکیدله دی.
قیزیل خاچ کمیتهسی قۉشیمچه قیلیشیچه، بوندی شرایطده اېنگ ضعیف قتلملر جمله دن، تۉییب آوقتلنمسلیکدن اذیت چېکهیاتکن بالهلر، کېکسهلر ناگیرانلیگی بۉلگن شخصلر، عایله بۉشلیگی بۉلگن شخصلر، عیاللر و کونلیک ایشچیلر نامتناسیب رویشذه کۉپراق ضرر کۉرماقده.
شونېنگدېک، تشکیلات قیتیب کېلگن مهاجرلر و زلزلهدن ضرر کۉرگنلرگه یاردم بېرگنینی، طالبان قماقخانه اداره سی بیلن همکارلیکده ۱۲ته قماقخانهنی کۉزدن کېچیرگنینی، محبوسلر بیلن یاپیق صحبتلر اۉتکزگنینی همده طالبان رسمیلری بیلن سقلش شرایطلری و اولرنی یخشیلش مساله لریده مذاکرهلر آلیب بارگنینی معلوم قیلگن.
