افغانستان نینگ بیرلشکن ملتلر تشکیلاتیدهگی دایمی نماینده لیگی سرپرستی نصیر احمد فایق تهرانده افغانستانلیک سابق ایکّی یوقاری مرتبهلی جنرال اکرام الدین سریع و محمد امین الماس نینگ اۉلدیریشینی جنایت دېب جدی آگاهلنتیریش صفتیده بهالهدی.
فایق بوگون پنجشنبه، ۴- جدی ایکس صحیفهسیده بېرگن بیاناتیده افغانستانلیک سابق حربیلرنینگ حتی چېت اېلده هم یۉق قیلینیشی دوام اېتهیاتکنینی و بو ایش آرتیده تورگن شخصلر تولیق جوابگرلیککه تارتیلیشی کېرکلیگینی تاکیدلهدی.
او بو جنایتلرگه نسبتن سکوت سقلشنی جنایتچیلر بیلن همکارلیک قیلیش دېب اتهدی.
فایق، شونېنگدېک شوندی دېدی: بیز بو حرکتنی قطعا قارهلیمیز و جنایتچیلر همده بویوروق بېرگن شخصلرنی تېزکار و شفاف تېرگاو آرقهلی جوابگرلیککه تارتیشنی طلب قیلهمیز”.
ایران منبعلری آلدینراق تخار ولایتینینگ سابق پولیس قومندانی جنرال اکرام الدین سریع، تهرانده اۉلدیریلگنی حقیده خبر بېرگن اېدی.
شو بیلن بیرگه، افغانستان آزادلیک جبههسی طالباننی تهرانده جنرال اکرام الدین سریع و محمد امین الماس نینگ اۉلدیریشیده عیبلب، بو قاتللیکلرگه جوابن قصاص آلینگنینی بیلدیرگن.
