خبرلرگه کۉره، ایرانده قیمتلشووگه قرشی و حکومتگه قرشی ناراضیلیک نمایشلری اۉنینچی کونیده هم بیر نېچه شهرلرده دوام اېتدی.
ایلام، همدان، مشهد، شیراز و بروجرد ولایتلری همده شهرلریده ناراضیلیک نمایشلری اۉتکزیلگنی حقیده خبرلر بار.
ایران نینگ اَیریم حکومتگه یقین عاموی اخبارات واسطهلری هم اوشبو ناراضیلیکلرگه تۉختهلیب اۉتگن.
فارس اخبارات آژانسی نینگ یازیشیچه، تهران بازاری قیمتلشووگه قرشی ناراضیلیک ییغینیگه گواه بۉلگن.
ترقهلگن ویدیولرده تهران بازاریدهگی سوداگرلر «مرگ بر دیکتاتور» (دیکتاتورگه اۉلیم) دېگن شعارلرنی ایتهیاتگنی و اولرنینگ ناراضیلیگی خوفسیزلیک کوچلری تامانیدن باستیریلهیاتگنی کۉرینهدی.
فارسنینگ یازیشیچه، سهشنبه کونی کېچقورون ایلام ولایتینینگ آبدانان شهریده اقتصادي مسألهلر مرکزیده ناراضیلیک نمایشی اۉتکزیلگن بۉلیب، او یکوني ساعتلرده تۉقنشوولر و جماعت ملکیگه ضرر یېتکزیش بیلن یکونلنگن. پولیس نمایشچیلرنی ترقتیش اوچون کۉزدن یاش چیقرووچی گازدن فایدهلنگن.
ترقهلگن ویدیولرده آبدانانده نمایشچیلر گوریچ قاپلرینی ییرتیب، گوریچنی یېرگه ساچهیاتگنی عکس اېتگن.
فارس ینه بیر خبریده ملکشاهی ایلام تومنیده بۉلیب اۉتگن ناراضیلیکلر چاغیده بیر نفر پولیس عسکری «ترتیبسیزلیک قیلووچیلر» تامانیدن اۉق آتیش نتیجهسیده اۉلگنینی یازگن.
خبرلرگه کۉره، سۉنگگی ناراضیلیکلر دوامیده اۉلگن ایکّی کیشینینگ دفن مراسمی هم زۉرآورلیککه ایلنگن.
اوشبو حکومتگه یقین عاموی اخبارارت واسطهلری و اصفهان شهرلریده هم قیمتلشووگه قرشی ناراضیلیک نمایشلری بۉلیب اۉتگنینی خبر قیلگن. سایت یازیشیچه، بو ایکّی ولایتده نمایشچیلر «ترتیبسیزلیکلر»نی قارهلهگن.
