امریکا جمهور رییسی دونالد ترامپ ینه تهدید قیلیب، اگر ایران حکومتی کوچلری نمایشچیلرنی قیرغین قیلیشگه قۉل اورسه، قۉشمه ایالات اولرگه جوده قتّيق ضربه بېریشینی ایتدی.
ترامپ کېچه پنجشنبه، 18- جدی فاکسنیوزبېرگن مصاحبهسیده حاضرگچه ایران نمایشلری دوامیده اَیریم آدملر هلاک بۉلگن حالتلر قید اېتیلگنینی، بیراق اولر نینگ اکثریتی آدملر گوجوملیگی سبب یوز بېرگنینی تأکیدلهدی.
او ایران توزومینی اغدریشگه بۉلگن اشتیاقنی «حیرتلنرلی» دېب تعریفلب، بو مملکت خلقینی اېرکینلیککه نسبتاً چوقور تویغوگه اېگه بۉلیشگه چقیردی.
ایرانده حاضرگی ناراضیلیک نمایشلری 13 کون اوّل تهراندهگی اَیریم سوداگرلر نینگ کسبه کالری قرشی چیقیشلری بیلن باشلنگن بۉلیب، تېز آرهده تورلی شهرلرگه ترقهلدی و حکومتگه قرشی شعارلر بیلن دوام اېتدی.
ایراندن تشقریده جایلشگن «ایران انسان حقوقلری» تشکیلاتی خبریگه کۉره، حاضرگچه اوشبو نمایشلرده 40 دن آرتیق کیشی هلاک بۉلگن و یوزلب آدملر حبسگه آلینگن.
نمایشلر کېنگهییب بارهیاتگنیدن سۉنگ، ایران حکومتی کېچه کوندن باشلب مملکت بۉیلب اینترنتگه کیریشنی اوزیب قۉیدی.
بوتون دنیا بۉیلب اینترنت تېزلیگی و اولنیشینی کوزهتیب بارووچی « نت بلاکس » تشکیلاتی ایرانده اینترنت نینگ تۉلیق اوزیلگنینی معلوم قیلدی.
«ف فلایت رادار 24» سایتی هم اینترنت اوزیلیشی سببلی ایراندهگی پروازلرنی کوزهته آلمهیاتگنینی، موجود معلوماتلر فقط چېکلنگن صنعي یۉلداش منبعلریگه تهیهنهیاتگنینی یازدی.
بوندن آلدین ایران رهبری علی خامهنهي سوداگرلر نینگ کسبهچیلری آشیشیگه قرشی ناراضیلیگی تۉغری اېکنینی ایتگن، بیراق «دشمن یاللنمهلری» اولر نینگ آرتیده تورگنینی و «اسلامگه و اسلام جمهوریتیگه قرشی» شعارلر ینگرهیاتگنینی تأکیدلهگن اېدی.
ایران رهبری ناراضیلر بیلن ملاقات قیلیش کېرهکلیگینی، اما «ترتیبسیزلیک قیلووچیلرنی جاییگه قۉییش لازم»لیگینی هم قۉشیمچه قیلگن.
حاضرگی ایران نمایشلری مهسا امیني نینگ اۉلیمی و «عیال، حیات، اېرکینلیک» حرکتیدن کېینگی اېنگ کېنگ کۉلملی ناراضیلیک نمایشلریدن بیری حسابلنهدی.
ایران حکومتی «عیال، حیات، اېرکینلیک» حرکتی دوامیده هم نمایشچیلرنی کېنگ مقیاسده باستیرگنلیک و اولرنی قیرغین قیلگنلیکده عیبلنگن اېدی.
