امریکا جمهور رییسی دونالد ترامپ ایرانگه قرشی «جوده جدّي» حربي چارهلرنی کۉریب چیقهیاتگن بیر پیتده، تهران مذاکره اۉتکزیشنی تکلیف قیلگنینی دعوا قیلدی.
ترامپ یکشنبه کونی کېچقورون، 12-جنوری ژورنالیستلرگه ایران امریکا تامانیدن یېتکزیلگن ضررلردن چرچهگنی اوچون مذاکره قیلیشنی ایستهیاتگنینی ایتدی.
ترامپ نینگ قۉشیمچه قیلیشیچه، ایران قیزیل چیزیقدن اۉتگن و نمایشچیلرنی باستیرماقده.
او شونینگدېک، امریکا اوردوسی ایرانگه حربي هجوم اویوشتیریش مسألهسینی جدّي طرزده کۉریب چیقهیاتگنینی بیلدیردی.
او تأکیدلهدی: «بیز بو مسألهنی جوده جدّي کۉریب چیقهیپمیز. اوردو اونی اۉرگنماقده و بیز جوده کوچلی وریانتلرنی کۉزده توتهیپمیز. قرار قبول قیلهمیز».
امریکاده جایلشگن ایران انسان حقوقلری فعاللری اخبارات آژانسی گزارشیگه کۉره، ناراضیلیک نمایشلری بیلن باغلیق زۉراورلیکلر عاقبتیده کمیده 538 کیشی اۉلدیریلگن، اولر نینگ 490 نفری نمایشچیلر حسابلنهدی.
مذکور گروه شونینگدېک، ایران رسميلری تامانیدن 10 مینگ 600 نفردن آرتیق کیشی حبسگه آلینگنینی معلوم قیلگن.
شو بیلن بیرگه، ایران رسميلری امریکا تامانیدن هجوم بۉلگن تقدیرده، جواب ضربهلری بېریلیشی حقیده آگاهلنتیرگن.
