طالبلرنینگ قندوز ولایتی امنیه قوماندانلیگی محلي ژورنالیست ناظره رشیدی و ینه تۉرت عیالنینگ قماققه آلینگنینی تصدیقلهدی.
اوشبو قوماندانلیک بوگون دوشنبه، ۲۲جدی بیلدیرگن بیاناتیده ناظره رشیدی مذکور عیاللر بیلن بیرگه «جنایي حادثه» بیلن باغلیق حالده حبسگه آلینگنینی معلوم قیلگن.
طالبلر امنیه قوماندانلیگینینگ ایتیشیچه، ناظره رشیدی ایلگری بیر محلي رادیو بیلن همکارلیک قیلگن، بیراق حاضرده هېچ قَیسی یېتکرمهده ایشلهمهیدی و اونینگ قماققه آلینیشی ژورنالیستیک فعالیتی بیلن باغلیق اېمس.
بیاناتده قۉشیمچه قیلینیشیچه، اوشبو سابق ژورنالیست و باشقه عیاللرنینگ ایشی تۉلیق تېرگاودن سۉنگ طالبان نینگ عدلی و قضایی اۉرگانلریگه تاپشیریلهدی.
طالبان نینگ قندوزدهگی امنیه قوماندانلیگی عیاللرنینگ قچان و قندهی شرایطده حبسگه آلینگنینی انیقلشتیرمهگن. شونینگدېک، اولرگه قۉییلگن عیبلاولر یوزهسیدن هم باتفصیل معلومات بېریلمهگن.
آلدینراق «افغانستان یېتکرمهلرینی قۉللب-قوّتلش تشکیلاتی» طالبان ناظره رشیدینی اۉتگن هفته سهشنبه کونی حبسگه آلیب، نامعلوم جایگه آلیب کېتگنی حقیده خبر بېرگن اېدی.
مذکور تشکیلات ناظره رشیدینی زودلیک بیلن آزاد قیلیش و اونینگ حبسگه آلینیشی اوچون رسمي همده حقوقي اساسلرنی اعلان قیلیشنی طلب قیلگن.
