بیرلشکن ملتلر تشکیلاتینینگ افغانستاندهگی یاردم ادارهسی (یوناما) سرپرستی جورجت گانیون طالبان تشقی ایشلر وزیری امیرخان متقی بیلن اوچرهشووده بیرلشکن ملتلر تشکیلاتی باش کاتبینینگ سیاسي و تینچلیک مسألهلری بۉییچه اۉرینباسری رزماری دیکارلو جاري آی آخریده کابلگه سفر قیلیشی حقیده معلوم قیلگن.
طالبان تشقی ایشلر وزیرلیگی بیاناتیده ایتیشیچه، یوناما باشلیغی امیرخان متقی بیلن اوشبو سفر یوزهسیدن صحبتلشیب، همکارلیکنی سۉرهگن.
رزماری دیکار افغانستان بۉییچه دوحه جریانینی ایلگری سوریش مسوولیتینی اۉز ذمّهسیگه آلگن مقام دیر. او هجري-شمسي 1403-ییلی سرطان آییده طالبان هیئتی اشتراکیده، بیراق افغانستان عیاللری و یشاوچیلیک جمعیتی وکیللری اۉتگن دوحه جریانینینگ اوچینچی ییغیلیشیگه رئیسلیک قیلگن.
بیرلشکن ملتلر تشکیلاتی اوچینچی دوحه اوچرهشوویدن سۉنگ، مخدره مادّهلرگه قرشی کورهش و خصوصي سکتورنی قۉللب-قوّتلش بۉییچه ایکّی ایشچی گروه تشکیل اېتیلگنینی اعلام قیلگن اېدی.
امیرخان متقی یوناما باشلیغی بیلن اوچرهشووده طالبان تامانیدن هر ایکّی ایشچی گروه دایرهسیده قانیقرلی یوتوقلرگه اېریشیلگنینی، بیراق باشقه تامانلر مقابل تیریکچیلیک منبعلری و بانک معمالرینی حل اېتیش بارهسیده یېترلی نتیجهلرگه اېریشه آلمهگنینی ایتگن.
طالبان تشقی ایشلر وزیری باشقه تامانلرنی عملي و جدّي قدملر تشلشگه چقیرگن.
طالبان تشقی ایشلر وزیرلیگی بیاناتیگه کۉره، یوناما باشلیغی دوحه جریانی دایرهسیدهگی ایشچی گروهلرنینگ آلدینگی اوچرهشوولری نتیجهسینی ایجابي بهالب، بو مسألهگه ینهده کۉپراق اعتبار قرهتیلیشینی تأکیدلهگن.
