رویترز اخبارات آژانسی نینگ خبر بېریشیچه، بیرلشگن ملتلر تشکیلاتی خوفسیزلیک کېنگشی بوگون پنجشنبه، 25-جنوری، امریکا طلبی بیلن ایران مسألهسی بۉییچه ییغیلیش اۉتکزهدی.
بو آرهده، امریکا نینگ بیر رسمي منبعی چهارشنبه کونی رویترزگه بېرگن معلوماتیده، قۉشمه ایالاتلر یقین شرقدهگی مرکزلریدن اَیریم خادملرینی آلیب چیقهیاتگنینی ایتگن. بو حرکت تهران یوقاری مرتبهلی رسميسی واشینگتن هجوم قیلگن تقدیرده، ایران قۉشنی دولتلرنی آگاهلنتیریب، او یېردهگی امریکا حربي قرارگاهلرینی نشانگه آلیشینی بیلدیرگنیدن سۉنگ عملگه آشیریلگن.
ایران رهبریتی حاضرگه قدَر دوچ کېلگن اېنگ جدّي ایچکی ناراضیلیکلرنی باستیریشگه اورینهیاتگن بیر پیتده، تهران امریکا جمهور رییسی دونالد ترامپ نینگ نمایشچیلر فایدهسیگه ارهلشیش حقیدهگی تکراري تهدیدلری نینگ آلدینی آلیشگه حرکت قیلماقده.
غربي بیر حربي مسوول چهارشنبه کونی رویترزگه شوندهی دېدی: «برچه بېلگیلر امریکا هجومی یقین اېکنینی کۉرستماقده، بیراق بو حکومت همهنی دایمي تیارگرلیک حالتیده اوشلب توریش اوچون شوندهی یۉل توتماقده. آلدیندن ایتیب بۉلمسلیک استراتیژي نینگ بیر قِسمیدیر.»
شو بیلن بیرگه، ترامپ آق اویده قیلگن چیقیشیده اوشبو بحرانگه نسبتاً صبر و کوزهتیش سیاستینی تنلهگنینی بیلدیردی.
ترامپ ژورنالیستلرگه ایراندهگی ناراضیلیکلرنی باستیریش چاغیده صادر بۉلهیاتگن قیرغینلر کمهییب بارهیاتگنی حقیده معلومات آلگنینی و حاضرگچه نمایشچیلرنی عامهوي قتل اېتیش رېجهسی یۉق، دېب حسابلشینی ایتدی.
او قیرغینلر توختهگنی حقیدهگی معلوماتنی کیم بېرگنی حقیدهگی سوالگه جوابن، اولرنی «قرشی تاماندهگی جوده مهم منبعلر» دېب تعریفلهدی.
امریکا جمهور رییسی احتمالي حربي حرکتنی انکار اېتمهدی و شوندهی دېدی: «بیز وضعیت نینگ رواجینی کوزهتهمیز،»دېیه قۉشیمچه قیلدی او و اۉز مأموریتی ایراندن «جوده ایجابي بیانات» آلگنینی تأکیدلهدی.
ایران تشقی ایشلر وزیری عباس عراقچی چهارشنبه کونی فاکس نیوزگه بېرگن صحبتیده حکومتگه قرشی نمایشلر حقیده شوندهی دېدی: «اېران تامانیدن آدملرنی قتل اېتیش بۉییچه هېچ قندهی رېجه یۉق.»
