امریکا جمهور رییسی دونالد ترامپ ایران رهبرلریگه برچهسی اعتراضچیلر بۉلگن 800دن آرتیق شخصگه نسبتاً بېلگیلنگن اۉلیم جزاسی اجراسی بېکار قیلینگنی اوچون منّتدارلیک بیلدیردی.
جناب ترامپ تروث سوشیال اجتماعي ترماغیده یازیشیچه، اوشبو شخصلر تیناوون جمعه کونی، 26 جدي قتل اېتیلیشی رېجهلشتیریلگن اېدی.
ترامپنینگ خبریده شوندهی دېیلگن: «کېچه عملگه آشیریلیشی کېرهک بۉلگن برچه رېجهلشتیریلگن قتل حکملری (800 دن آرتیق حالت) ایران رهبریتی تامانیدن بېکار قیلینگنی اوچون کتّه حرمت بیلن قریمن. رحمت!»
امریکا جمهور رییسی، شونینگدېک ژورنالیستلرنینگ «سیزنی ایرانگه هجوم قیلمسلیککه کیم کۉندیردی؟» دېگن سوالیگه جوابن شوندهی دېدی: «هېچ کیم مېنی کۉندیرمهدی، مېن اۉزیمنی اۉزیم کۉندیردیم. کېچه 800 دن آرتیق قتل حکمینی اجرا اېتیش رېجهلشتیریلگن اېدی. اولر هېچ کیمنی قتل اېتمهدی. اولر قتل جزالرینی بېکار قیلدی. بو جوده کتّه تأثیر کۉرستدی.»
دونالد ترامپ ایرانده ناراضیلیک نمایشلری کېنگهیگنیدن سۉنگ بیر نېچه بار آگاهلنتیریب، اگر ایران نمایشچیلرنی قیرغین قیلیش و قتل اېتیشگه قۉل اورسه، قتّيق ضربهگه دوچ کېلیشینی ایتگن اېدی.
بیراق او پنجشنبه تانگیده ایشانچلی استخبارات منبعلریدن ایرانده قیرغین و قتل جزالری تۉختهتیلگنی حقیده معلومات آلگنینی اعلان قیلدی.
شو بیلن بیرگه، انسان حقوقلری تشکیلاتلری ناراضیلیک نمایشلری و اعتراضچیلرنینگ کېنگ کۉلملی باستیریلیشی دوامیده ایکّی مینگدن آرتیق آدم هلاک بۉلگنی و مینگلب کیشی حبسگه آلینگنی حقیده خبر بېرماقده.
