محلي منبعلرنینگ معلوم قیلیشیچه، کېچه تونده طالبلرنینگ امر بالمعروف و نهی از منکر محتسبلری بیر گروه طلبهلر اوچون اۉتکزیلگن بیتیروو مراسمیگه کیریب باریب، اولر نینگ نکتاییلرینی تارتیب آلگن.
منبعلر بوگون شنبه ، 27 جدي یېتکیرمهلرگه بېرگن معلوماتیده، بو مراسم هراتدهگی طبیات فاکولتهسی نینگ ییگیرمه تۉقّیزینچی بیتیروو طنطنهسی بۉلیب، اونده قریب 50 نفر محصل اشتراک اېتگنینی ایتگن.
اجتماعي ترماقلرده ترقلگن اوشبو مراسمگه عاید عکسلرده هم طالبلرنینگ امربالمعروف و نهی ازمنکر بۉلیمیگه منسوب اوچ نفر شخص آق چاپان و قورال بیلن طلبهلر مقابلیده تورگنی کۉرینهدی.
بو حالت شوندهی بیر پیتده یوز بېرماقدهکه، طالبلر افغانستانده حاکمیتنی قۉلگه آلگنیدن بېری طلبهلر و اۉقووچیلر درسلرگه کۉیلک-ایشتان سقال و باش کییم بیلن قتنهشیشگه مجبور اېتیلماقده.
آلدینراق هم طالبلر هراتدهگی بیر هوتل اېگهسینی سقالی یۉقلیگی و نکتایی باغلهگنی سببلی حبسگه آلگن اېدی.
و شونینگدېک اوشبو آی جریانیده تخاردن هم بیر قنچه استادلرنی سقالی قیسقهلیگی سببلی امر بالمعروف محتسبلری قۉلگه آلیب و بیر کون آقشامگچه قمگن اېدی.
سۉنگگی کونلرده اېسه طالبلر نینگ امر بالمعروف ونهی از منکر محتسبلری عیاللرنی اۉزلری بېلگیلهگن حجابگه رعایه قیلمهگنی اوچون موتر و تکسیلردن توشیریب یوباریش حالتلری هم کوزهتیلگن.
هرات اهالیسینینگ ایتیشیچه، سۉنگگی کونلرده طالبلرنینگ قتّيق قۉل چارهلرینی کوچهیتیریشی کوندهلیک حیاتنی جدّي قیینچیلیکلرگه دچار قیلماقده
