طالبلرنینگ اېکینچیلیک، چارواچیلیک و سوغاریش وزیرلیگی قَیتیب کېلگن مهاجرلرگه بوغدای و نقد پول یاردمینی ترقهتیش جریانی باشلنگنینی معلوم قیلدی.
وزیرلیک اعلانیگه کۉره، اوشبو جریان بوگون (دوشنبه، ۲۹ جدی) بغلان ولایتیدن باشلنگن بۉلیب، بوتون مملکت بۉیلب عملگه آشیریلهدی.
بغلانگه سفر قیلگن طالباننینگ اېکینچیلیک وزیری عطاوالله عمرینینگ ایتیشیچه، بوغدای و نقد پول ترقهتیش ایشلری باسقیچمه-باسقیچ باشقه ولایتلرنینگ مرکزلری و اولسواللیکلریده هم یۉلگه قۉییلهدی.
اوّلراق طالبان رهبری هبتالله آخوندزاده «مهاجرلر معمالری بۉییچه کمیسیون»گه ایران و پاکستاندن مجبوری چیقریب یوباریلگن مهاجرلرگه اېکینچیلیک وزیرلیگی ذخیرهلریدن بوغدای و نقد پول ترقهتیش بۉییچه تاپشیریق بېرگن اېدی.
طالبان رهبری، شونینگدېک، اوشبو مهاجرلر اوچون یېر اجرهتیش و شهرچهلر قوریش جریانینی تېزلشتیریشنی طلب قیلگن.
طالبان مسووللرینینگ بیلدیریشیچه، مذکور کۉرستمه اساسیده حاضرگچه اوچ مینگ ۴۶ نمره یېر ایران و پاکستاندن چیقریب یوباریلگن مهاجرلرگه تقسیملنگن.
جاري قویاش ییلده ایران و پاکستان افغانستانلیک مهاجرلرنی چیقریب یوباریش جریانینی کوچهیتیرگن بۉلیب، طالبان معلوماتلریگه کۉره،۲.۸میلیون مهاجر دېپورت قیلینگن.
خلق ارا انسان پرور تشکیلاتلر اېسه کۉپلب مهاجرلر هېچ نرسهسیز افغانستانگه قَیتگنینی و اۉته ضعیف حالتده اېکنینی تأکیدلهماقده.
