افغانستاننینگ بیرلشگن ملتلر تشکیلاتیدهگی دایمي نمایندهلیگی سرپرستی نصیر احمد فایقنینگ ایتیشیچه، افغانستانده انسانیتگه قرشی جنایتلر فقط اۉتمیشگه تعلقلی اېمس، بلکه بو مملکتنینگ حاضرگی واقعلیگی بۉلیب، هنوز دوام اېتماقده.
جناب فایق بیرلشگن ملتلر تشکیلاتینینگ «انسانیتگه قرشی جنایتلرنینگ آلدینی آلیش و اولرنی جزالش تۉغریسیدهگی شرطنامه» بۉییچه تیارگرلیک کمیتهسی ییغیلیشیده، طالبانلر قَیته حاکمیتنی اېگهلهگنیدن سۉنگ افغانستان خلقی کېنگ کۉلملی و تیزیملی انسان حقوقلری بوزیلیشلریگه دوچ کېلهیاتگنینی تأکیدلهگن.
او مجبوري یۉقالیشلر، اۉزباشیمچهلیک بیلن حبسگه آلیشلر، قییناقلر، تعقیب و تضییقلر، مجبوري کۉچیریش همده اساسي حقوقلردن محروم اېتیلیشنی طالبلر تامانیدن صادر اېتیلهیاتگن جدّي انسان حقوقلری بوزیلیشلری صفتیده سنهب اۉتگن.
افغانستاننینگ بیرلشگن ملتلر تشکیلاتیدهگی نمایندهلیگی سرپرستی، شونینگدېک، طالبانلرنینگ افغانستان عیاللری و قیزلریگه قرشی سیاستی تیزیملی و اویوشگن اېکنینی، اولر قانونلر، فرمانلر و نهادینهلشتیریلگن عملیاتلر آرقهلی عیاللرنی تعلیم آلیش، ایشلش، اجتماعي حیاتده اشتراک اېتیش و عدالتگه اېریشیش حقوقیدن محروم قیلگنینی ایتگن.
جناب فایقنینگ سۉزلریگه کۉره، طالبلر، شونینگدېک، اېتنیک و مذهبی آزچیلیکلر، ژورنالیستلر، انسان حقوقلری فعاللری همده سابق منصبدارلرنی اولرنینگ شخصیتی، اعتقادی و اۉتمیشدهگی فعالیتی اساسیده تعقیب قیلماقده.
اونینگ اورغولشیچه، طالبلر تامانیدن صادر اېتیلهیاتگن بو انسان حقوقلری بوزیلیشلری علیحده-علیحده واقعهلر اېمس، بلکه انسانیتگه قرشی جنایت صفتیده بهالنیشی ممکن بۉلگن برقرار خلق-اطوار اندازهلرینی نمایان اېتهدی.
افغانستاننینگ بیرلشگن ملتلر تشکیلاتیدهگی نمایندهلیگی سرپرستی شونینگدېک، «انسانیتگه قرشی جنایتلرنینگ آلدینی آلیش و اولرنی جزالش تۉغریسیدهگی شرطنامه»ده جنسیتی آپارتاید جنایت صفتیده بېلگیلشگه چقیرگن، تاکه بو بارهدهگی حقوقي بۉشلیقلر و جوابگرلیک مسألهلری برطرف اېتیلسین.
طالبانلر افغانستانده قَیته حاکمیتگه کېلگنیدن بویان عیاللرنینگ اساسي حقوق و اېرکینلیکلریگه کېنگ کۉلملی چېکلاولر جاري اېتیب، اولرنی تعلیم و ایش قیلیش حقوقیدن محروم اېتیب کېلماقده.
بیرلشگن ملتلر تشکیلاتی متخصصلرینینگ ایتیشیچه، طالبلرنینگ افغانستان عیاللریگه نسبتاً مناسبتی «انسانیتگه قرشی جنایت» حسابلنهدی و او جنسیتی آپارتاید صفتیده هم بهالنیشی ممکن.
