تخار ولایتیدن محلي منبعلر یېتکیرمهلرگه معلوم قیلیشیچه، طالبلر استخبارات کوچلری چاهاب اولسواللیکیده ناراضیلیک نمایشلریده قتنهشگنلرنی حبسگه آلیش جریانینی باشلهگن.
منبعلرگه کۉره، سۉنگگی بیر هفته ایچیده چاهآب اولسواللیکینینگ تورلی قیشلاقلریدن محمد امین، محمد هاشم و قارهخان آتلی اوچ کیشی طالبلر استخباراتی تامانیدن حبسگه آلینگن.
منبعلرنینگ قۉشیمچه قیلیشیچه، اَیریم محلي آقسقاللر اوشبو شخصلرنی آزاد قیلیش مسألهسیده طالبلرنینگ محلي مسووللری بیلن مذاکره اۉتکزیش اوچون بارگن، بیراق حاضرگچه حبسگه آلینگنلرنینگ تقدیری نامعلوم قالماقده.
طالبلر حاضرگچه بو بارهده هېچ قندهی ایضاح بېرمهگن.
بو ناراضیلیک نمایشلری اۉتگن آی اۉرتهلریده چاهاب اولسواللیکیدهگی آلتین کانلرینی قزیب آلیش مسألهسی یوزهسیدن باشلنگن و بیر نېچه کون دوام اېتگن. ناراضیلیکلر زۉرآورلیککه هم ایلهنیب، کمیده 5 کیشی هلاک بۉلگن، ینه 16 کیشی یرهلنگن.
تخار ولایتینینگ چاهاب اولسواللیکیده آلتین کانلری قزیب آلینهیاتگنیگه قرهمهی، اَیریم محلي اهالی حاضرگچه اولر اوچون هېچ قندهی اجتماعي خدمتلر تقدیم اېتیلمهگنینی اَیتماقده.
اولر کانلرنی قزیب آلیش عوضیگه اهالیگه اساسي خدمتلر کۉرسهتیش، یۉللرنی قَیته قوریش و برق تأمیناتینی یۉلگه قۉییشنی طلب قیلماقده.
