طالبلر تامانیدن «ملي شفاخانه» دېب ناملنگن سرطان کسللیکلرینی انیقلش و دوالش مرکزی بوگون، پنجشنبه کابل شهریده آچیلدی.
طالبلرنینگ ساغلیقنی سقلش وزیری نورجلال جلالی آچیلیش مراسمیده اوشبو شفاخانه وزیرلیک تکلیفی و طالبلر رهبرینینگ تصدیغی بیلن فعالیت باشلهگنینی ایتدی.
اونینگ تأکیدلشیچه، مذکور شفاخانه کېلگوسی ییللرده «استراتیژیک رېجه» اساسیده مملکت یشاوچیلرگه یوقاری کیفیتگه اېگه اختصاصلشتیریلگن طبي خدمتلر کۉرسهتهدی.
طالبلر ساغلیقنی سقلش وزیری شوندهی دېدی: «بیز هندستان بیلن همکارلیکده سرطاننی دوالش شفاخانهسیده رادیوترپ امکنیتلرینی یرهتیشنی رېجهلشتیرگنمیز.»
شونینگدېک، او اوشبو شفاخانهده اختصاصلشتیریلگن دستورلرنی یۉلگه قۉییش و متخصصلرنی مملکت ایچیده تیارلش رېجهلری بارلیگینی قۉشیمچه قیلدی.
شو بیلن بیرگه، طالبلر باشقروویدهگی ساغلیقنی سقلش وزیرلیگینینگ طبي خدمتلر کۉرسهتیش بۉییچه معاونی عبدال ولی حقّاني سۉنگّی ییللرده سرطان بیلن کسللنگن بېمارلر ضرور دوالش امکانیتلری یۉقلیگی سببلی چېت اېلگه چیقیشگه مجبور بۉلگنینی، حاضر اېسه بو خدمتلر مملکت ایچیده یۉلگه قۉییلگنینی ایتدی.
بیراق اَیریم سرطان بېمارلری و اولرنینگ عایله اعضالری مملکتده اوشبو کسللیکنی انیقلش و دوالش اوچون یېترلی شرایطلر یۉقلیگیدن شکایت قیلماقده و جدّي معمالرگه دوچ کېلهیاتگنینی بیلدیرماقده.
تأکیدلش کېرککه، سرطان کسللیکلری تنهده نظارتدن تشقری اۉسیش و غیرِ طبیعي حجرهلرنینگ ترقهلیشی بیلن توصیفلنهدیگن کسللیکلر گروهی بۉلیب، اولر نینگ 100 دن آرتیق توری موجود. جملهدن، کۉکرک، اۉپکه، قان و آشقازان سرطانی شولر جملهسیدن دیر.
