پاکستان اوردوسی بلوچستانده یوز بېرگن تۉقنهشوولر عاقبتیده 92کیشی جنگری، 18 نفر تینچ اهالی و 15 نفر خوفسیزلیک خادیمی اۉلدیریلگنینی معلوم قیلدی.
پاکستان اوردوسی بیاناتیده ایتیشیچه، «هندستان فتنهسی گروهیگه علاقهدار ترورچیلر» (شنبه، 11 دلو) بیر نېچته هجوملر اویوشتیریب، کویته، مستونگ، نوشکی، دالبندین، خاران، پنجگور، تومپ، گوادر و پسنی اطرافیده تینچ اهالینی نشانگه آلگن.
پاکستان بلوچ قوراللی گروهلرینی «هندستان فتنهسی» دېب اتهیدی. اوشبو گروه تیناوون بلوچستانده بیر نېچته هجوملر عملگه آشیریلگنی و اَیریم منطقهلرنی نظارتگه آلینگنی حقیده خبر بېرگن اېدی.
پاکستان اوردوسینینگ بیلدیریشیچه، «ترورچیلر یمان نیت بیلن 18 نفر بېگناه تینچ اهالینی (جملهدن عیاللر، بالهلر، کېکسهلر و ایشچیلرنی) نشانگه آلگن».
بیاناتده ینه قید اېتیلیشیچه، خوفسیزلیک کوچلری و حقوقنی محافظه قیلووچی ادارهلر زودلیک بیلن جواب چارهلرینی کۉرگن و بلوچستان بۉیلب کېنگ کۉلملی تازهلش عملیاتلرینی باشلهگن. اوشبو عملیاتلر نتیجهسیده «هندستان تامانیدن قۉللب-قوّتلنگن 92 نفر ترورچی، جملهدن اوچ نفر خودکوش پارتلاوچی یۉق قیلینگن».
بلوچستان آزادلیک اوردوسی دېب اتهلووچی بلوچ جنگری گروهی بو رقملر یوزهسیدن حاضرچه ایضاح بېرمهگن.
شو بیلن بیرگه، پاکستان اوردوسی معلوماتیگه کۉره، تازهلش عملیاتلری و تۉقنهشوولر دوامیده 15 نفر خوفسیزلیک خادیمی اۉلگن.
پاکستان اوردوسینینگ جماعتچیلیک بیلن علاقهلر بۉلیمی استخبارات گزارشلری اوشبو هجوملر پاکستاندن تشقریده فعالیت یوریتووچی ترورچی ترماق یېتکچیلری تامانیدن رېجهلشتیریلگنی و حادثه دوامیده ترورچیلر بیلن تۉغریدن-تۉغری علاقهده بۉلینگنینی انیق تصدیقلهگنینی بیلدیرگن.
پاکستان رسميلری دایمي روشده قوراللی گروهلر افغانستان توپراغیدن فایدهلنهیاتگنینی ادعا قیلیب کېلهدی. اسلام آبادگه کۉره، طالبان افغانستانده حاکمیتگه قَیتگنیدن سۉنگ پاکستاننینگ شِمالی-غربي حدودلریده، جملهدن بلوچستانده بېقرارلیک کوچهیگن.
