طالبان تشقی ایشلر وزیرلیگی بوگون چهارشنبه ۱۵ – دلو بیر بیانات نشر قیلیب اعلام قیلیشیچه، کابلده بیرلشگن ملتلر تشکیلاتی نمایندهلیگی یا -ده «یوناما» میزبانلیگیده، دوحه نوبتدهگی ییغینیگه عاید بیر مجلس اۉتکزیلگن.
بو حقده نشر اېتیلگن بیاناتده، اوشبو ییغین، دوحه ییغینی ایش گروپی مجلسی دایرهسیده اۉتکزیلگنی بیلدیریلگن.
ییغینده، طالباننینگ تشقی ایشلر، ایچکی، ایکینچیلیک و ساغلیقنی سقلش وزیرلیکلری همده بیرلشکن ملتلر تشکیلاتی، اروپا اتفاقی، اسلامی همکارلیکلر تشکیلاتی شامل بیر قنچه خلقارا همجمعیت نمایندهلری اشتراک اېتگن.
ییغینده، طالبان نمایندهلری بو حاکمیت رهبرینینگ بویروغیدن کېین، افغانستانده کوکنار اېکیش و مخدره مادهلرنی ایشلب چیقریش یۉق اېتیلگنینی ادعا قیلیب، صنعی مخدره مادهلر موجودلیگی خصوصیده اۉز خواطرینی بیلدیرگنلر.
طالبانگه کۉره، مخدره مادهلرنی یۉق اېتیش خصوصیده اعتبار قرهتیلمهگن تقدیرده، بو مسالهدن یالغیز افغانستان اېمس بلکه منطقه مملکتلری هم زیان کۉرهدی.
عین حالده، بو ییغینده طالبان تشقی ایشلر وزیرلیگی، خلق ارا همجمعیتی وکیللری افغانستانده، مخدره مادهلر اېکیلیشی و ایشلب چیقریلیشی سېزیلرلی درجهده آزهیگنینی تیلگه آلیب، بو خصوصده افغانستان اوچون بۉلگن یاردملری دوامیدن ایشانچ بېرگنینی بیلدیرگن.
ایتیش کېرهک که دوحه نوبتدهگی ییغینی، کابل میزبانلیگیده اۉتکزیلیشی ممکنلیگی حقیده خبرلر نشر اېتیلماقده دیر.
