سعودی عربستان تشقی ایشلر وزیرلیگی بوگون چهارشنبه ۱۵ – دلو، اوشبو وزیرلیک رسمی ویبسایتیده، تورکیه جمهور باشلیغی رجب طیب اردوغان و سعودی عربستان ولیعهدی محمد بن سلمان اوچرهشوویدن کېین تیارلنگن قوشمه بیاناتنی نشر قیلدی.
سعودی عربستان تشقی ایشلر وزیرلیگی تامانیدن نشر اېتیلگن بیاناتگه کۉره، تورکیه و سعودی عربستان یوقاری مرتبهلی رسمیلری اوچرهشوویده، تورلی مسالهلر حقیده فکر المشتیریلگن.
دیمک اوشبو اوچرهشوو، تورکیه جمهور باشلیغینینگ سعودی عربستان پایتختی ریاض شهریگه بۉلگن سفری دایرهسیده اۉتگن کۉن سهشنبه ۱۴ – دلو اۉتکزیلدی.
قوشمه بیانات اساسیده، اوچرهشووده ایککی تامانلمه همکارلیکلر اینقسه، اقتصادیات، سودا، خوفسیزلیک و مدافعه، مدنیت و توریزم، انرژِی شونگه اوخشش باشقه بیر قنچه مسالهلر حقیده بحث بۉلینگن.
عینی حالده، تورکیه دولت رهبری سعودی عربستان ولیعهدی بیلن، دنیاده یوز بېریب تورگن وضعیت و اوزگریشلر حقیده هم صحبتلشگن.
ایککی تامان فلسطین مسالهسی خصوصیده به تفصیل صحبت قیلیب، فلسطینده یوز بېریب تورگن آغیر انسانی وضعیت خصوصیده اۉز خواطرلرینی بیلدیرگن و شو بیلن بیرگه فلسطینده آتیش-کېسین تامینلنیشی، بو وضعیتگه ضد اسراییل حرکتلری تۉختهتیلیشی و دایمی تینچلیک اوچون ایککی دولتلیک ریجه عملگه آشیریلیشیگه تاکید قیلگنلر.
تورکیه و سعودی عربستان دولت رهبرلری، اوکراین، سومالی و یمن کبی مملکتلردهگی وضعیتلردن هم اېسلب، مملکت مستقللیگیگه اعتبار قرهتیلیشی و خلقارا تینچلیک اهمیتی حقیده تۉختهلیب اۉتگنلر.
ایتیش کېرهک که تورکیه جمهور باشلیغی، اۉتگن کون سعودی عربستان و مصر مملکتلریگه بۉلگن رسمی سفری باشلهدی و بوگون مصر پایتختی قاهره شهریگه سفر قیلیشی کوتیلهدی.
